2014-11-20
太陽報
今年本港嘅零售表現唔係咁理想，搞到香港舖租一哥嘅位置都保唔住，劉Sir睇到高緯環球最新發布嘅《Main Street Across the World》，香港銅鑼灣舖位嘅舊年十月到今年九月平均呎租約1,778元，按年跌咗6.8%，令到期內呎租錄到13.3%增長嘅紐約第五大道上段，成功上位，以呎租約2,275元成為全球最貴商舖地段。該公司話，九月下旬香港發生佔中事件，更加進一步打擊零售核心區的消費情緒。呢份報告指出，隨着經濟復甦持續，舊年十月到今年九月，世界各地零售核心區租金平均升咗2.4%，升幅屬於溫和。而排名最昂貴零售區域嘅城市，今年位置就有明顯變動，好似第五大道上段嘅租金就破晒紀錄，每方呎去到約2,275元，按年急升13.3%，擊退銅鑼灣，重奪榜首位置。
事實上，銅鑼灣商舖租金係全球十大舖租最昂貴城市中，今年唯一一個出現跌幅，呎租按年跌6.8%，得番約1,778元。
佔中打擊消費情緒
高緯環球香港商舖部執行總監胡詠詩話，今年香港面對零售表現顯著下滑、內地訪港旅客又減少咗，令到啲零售商喺香港嘅擴張步伐都比較謹慎。而九月下旬發生嘅佔中事件，更加進一步打擊零售核心區的消費情緒，尤其銅鑼灣同旺角嘅主要幹道仍被學生們堵塞。
至於其他城市，巴黎香榭麗舍大道今年租值就無變，仍穩守第三位，隨後排名第四為倫敦新龐德街，租金於去年升4.2%，呎租約790元。
悉尼碧街租金飆25%
悉尼碧街購物區由於今年有多個國際零售商進駐，所以排名由舊年第八位，跳升到今年第五位，租金急升25%。
另一方面，高力國際都有份講全球十大最貴的商舖租金報告。據了解，亞太地區租金最貴嘅地段，前三名由香港中環皇后大道中、尖沙咀廣東道及銅鑼灣包辦，而新加坡烏節路喺亞太地區之中，今年排名就微跌一位，去到第七位。
劉Sir