2015-08-17
太陽報
今年樓價繼續以理想幅度上升，部分早幾年買入?蟹貨，終於都可以返到家鄉。劉Sir睇番今年啲成交紀錄，好似上年頭七個月成交宗數蝕讓比例高達64%同54%?何文田半山壹號同西南九龍瓏璽，今年到依家蝕讓比例減到得番33%同29%，個別業主帳面仲可以賺四成走人，雖然近期外圍經濟有啲波動，但相信豪宅樓價都撐得住，估計會愈嚟愈多業主可以甩身。
上年頭七個月，半山壹號有22宗成交，佔14宗或約64%帳面要蝕讓，但今年情況就好唔同，今年頭七個月約莫錄21宗買賣登記，當中有7宗帳面要蝕入肉，佔比例只係33%，其實當中有唔少帳面只係蝕少少，好似有個半山徑15號中層戶，一○年買入價係2,430萬元，今年以2,400萬元賣出，蝕咗約1.2%。
而另一個業主喺○八年以約2,087萬元買入一個半山徑28號中層戶，今年以2,080萬元賣咗，帳面都只係蝕幾萬。有個半山徑12號低層戶，○九年買入價1,289萬元，依家賣咗1,865萬元，賺幅更接近45%。
比墅買賣半數損手
另一個翻身盤係瓏璽，上年頭七個月蝕讓宗數比例高近54%，但今年到依家14宗買賣登記，只得4宗帳面要蝕讓，蝕幅跌到得番29%，每宗帳面蝕約20幾萬到近60萬元。
而有部分單位賺幅仲唔錯，好似有個3座中層C室，一一年買入價逾1,325萬元，今年以1,583萬元賣出，升值近20%。
至於大埔比華利山別墅，上年頭七個月錄到8宗買賣登記，但當中只得1宗帳面有錢賺，蝕讓比例高近88%，到今年就有明顯進步，到依家同期已經有11宗二手買賣登記，當中6宗蝕讓，蝕讓比例大幅下降到約55%。
名家匯仍全數見血
不過，仲有一啲盤仍然未返到家鄉，近幾年開售?沙田名家匯，今年首七個月錄到兩宗買賣登記，全部見血，同舊年同期一樣，出現百分百蝕讓。其中有個2座A單位，一二年以2,400萬元買入，揸咗約莫三年以1,980萬元賣出，帳面唔見約420萬元，蝕幅約17.5%，至於另一個1座單位，業主揸咗四年帳面蝕11.3%。
劉Sir