2014-11-18
太陽報
本港經濟前景仍然係陰晴不定，搞到愈來愈多豪宅銀主盤湧出嚟。港島半山羅便臣道1號，繼之前有個三層複式單位拍咗幾次都未賣到之後，最近又一次過多咗兩個銀主盤，叫價約4,100萬元同6,500萬元。由於呢幢物業以用家主導，所以放盤量一向唔多，依家淨係銀主盤都有3個算係相當罕有，亦係區內暫時最多銀主盤嘅物業。地產代理老友同劉Sir話，近排市場多咗啲豪宅銀主盤，部分仲係一啲比較罕有嘅單位，新近羅便臣道1號就多個兩個同類單位。
削價三成仍無承接
其中一個中高層複式單位，實用面積約2,626方呎，連車位叫價約6,500萬元，實用呎價約2.48萬元；而另一個實用面積約1,798方呎高層單位，連車位叫價約4,100萬元，實用呎價約2.28萬元。
羅便臣道1號一向流通量好少，今年三月一個原本由周氏家族成員持有嘅複式單位，就比銀主攞出嚟拍賣，當時叫價9,800萬元，之後幾次減價重拍，上個月開價累減約30.6%或3,000萬元，去到6,800萬元，但依然未獲承價下再被收回。
講番今個月二手豪宅市況，由於有唔少豪宅新盤推出，搶咗市場焦點，相比上個月嚟睇，好似靚咗啲，不過靚咗依然有人吼實。好以上水St. Andrews Place有望打破今年悶局，有幢實用面積約3,945方呎洋房，獲買家以約6,500萬元洽購，實用呎價約1.65萬元。
美麗閣1650萬開齋
中原胡洛勇話，西半山美麗閣都啱啱錄到今個月首宗成交，該廈一個中層C室，實用面積1,215方呎，以1,650萬元賣出，實用呎價約1.36萬元。個原業主都幾長情，揸咗個單位好多年，依家升值咗約17.5倍。
利嘉閣顏廷軒話，九龍站君臨天下今個月錄到兩宗成交，其中1座低層D室，以1,650萬元賣出，實用呎價約2.2萬元，原業主持貨五年帳面賺290萬元。
劉Sir