2015-03-06
太陽報
全世界都知香港豪宅出名貴，但唔揸番幾間又點襯得起超級富豪嘅身份。劉Sir睇過萊坊同中銀國際發表嘅二○一五年《財富報告》，舊年擁有資產淨值3,000萬美元或以上嘅內地同香港超級富豪，平均每個人手持4.7間及4.6間豪宅，係全球最多首兩位，明顯比起全球平均只持有3間多，而香港身家超過10億美元（約78億港元）嘅頂級富豪舊年就有53人咁多，係亞洲城市中居首。
劉Sir知道，呢個財富報告係調查咗全球97個國家，共107個城市，喺舊年平均每日就有約15人加入資產淨值3,000萬美元或以上超級富豪呢個行列。
物業投資佔比38%
呢班超級富豪愈來愈注重將物業視為主流投資類別，就亞洲區超高資產淨值人士嚟睇，物業佔佢哋嘅投資組合中平均38%，有22%受訪者都話喺舊年增加咗物業投資比重，而內地同香港嘅超高資產淨值人士，平均每人有4.7間及4.6間豪宅，包辦全球首兩位。至於資產淨值超過10億美元嘅頂級富豪，舊年香港就有53人，係亞洲城市中最巴閉。
報告提到全球資產淨值3,000萬美元或以上嘅超級富豪，喺未來十年會增加約34%去到近23.1萬人，萊坊紀言迅話，到時香港超級富豪人數會增加約47%至3,941人，而中國更會大升約87%，去到約15,681人。
另涵蓋全球100個主要城市嘅萊坊國際豪宅指數，舊年全球豪宅價格平均升2%，升幅較一三年的2.8%為少。
港豪宅價世界第二
其中美國紐約豪宅價格去年升18.8%最多，而香港受到樓市政策影響，豪宅價格只升約1.1%，排第56，不過價格就維持喺全球第二位，每100萬美元只能夠買到215方呎香港豪宅，計番港紙每方呎超過3.6萬元。
萊坊報告指，中國成為全球「富翁出口國」。截至一三年嘅十年入面，移民或者獲海外公民身份嘅中國富翁超過7.6萬人，澳洲係中國富翁移民首選地，喺截至一月嘅兩年內，該國重要投資簽證申請者入面，中國人佔比逾90%，達1,384人。