2015-03-05
太陽報
日前公布嘅一月份零售銷貨額大跌逾一成，農曆新年後隨街都係吉舖嘅銅鑼灣同旺角，睇嚟未來舖市將會進入寒冬。除咗投資物業亦經營鞋店嘅林子峰同劉Sir話，今年租約到期嘅銅鑼灣鞋舖亦唔打算續租，相信上半年核心區舖租會跌15%。有學者亦估計，近期核心區吉舖同減租舖將會增加，今年商舖物業租金預計會跌8至15%。
本港零售數據持續低迷，林子峰話，受個人遊旅客放緩影響，銅鑼灣一線街舖嘅生意淡靜，我地有兩個銅鑼灣舖位都好靜。
其中喺駱克道嘅鞋店今年十一月底租約期滿，都打算關閉，相信同區其他大牌子都會陸續將多出嘅店舖搬走，而上半年核心地區舖租估許會跌10至15%。
至於旗下零食店「優品360」，今年原本諗住增設逾15間店舖，但呢輪有唔少示威活動，依家持觀望態度，放慢擴張，決定將開舖目標減到10間左右。
其實農曆新年過後，唔少短租客都撤出核心旺區，隨街都有吉舖出現。
劉Sir數一數，扣除短租，旺角西洋菜南街由亞皆老街至登打士街一帶，一月份就有約8間吉舖，喺農曆年過後其中兩個舖成功租出，現時條街仍然有6間吉舖，個別仲吉咗超過九個月。
而銅鑼灣怡和街一月份有5間吉舖，上個月增加到6間，截至昨日依然維持不變，交吉最長達六個月，單係呢兩條街合共有12間吉舖。
另一方面，理大許智文就話，近期已留意到旺角吉舖或減租有增加趨勢，零售市道轉差，繼金舖生意下跌之後，連藥房市道都轉差，難免影響舖租。
鄧耀昇：非入市時機
而政府建議收緊個人遊及一簽多行等措施，短期已對市場有心理影響，料長遠的影響會達兩至五年之久，今年商舖物業租金預期跌8至15%。
舖王鄧成波孻仔鄧耀昇亦都話，購買物業會以自用角度出發，市場已開始調整，並非入市好時機，過去核心區租金升幅過急，依家已回吐，料跌幅約10%，民生區則唔受影響。
面對零售業不景氣同理貴租，唔少零售商都唔排除會關舖。佐丹奴（00709）日前就話，店舖租金壓力大，集團會繼續因應租金加幅而遷舖，繼早前已關閉一間銅鑼灣地舖後，更透露未來數月仍會有銅鑼灣店舖關閉。
六福（00590）黃偉常亦話，如個別店舖生意欠佳，以及租金太貴，不排除有搬舖或關店嘅行動。
大行齊睇淡港零售
CEC國際（00759）林偉駿都話，淡市下反而係發展好時機，不過開店態度都會謹慎啲，計劃下個財年新增30間分店，較本財年60間大幅減少。
大行亦看淡零售市道。瑞信話，本港一月零售銷售數據令人失望，雖然當中包括農曆年因素，但亦反映本港零售銷售基本面轉弱。摩通亦認為零售業受到內憂外患打擊，本地及遊客消費力均有下降。
美聯工商舖盧展豪預計較多珠寶鐘錶行業的銅鑼灣舖租，跌幅最多15%，而旺角區舖位租金亦至少跌10%。