2014-02-17
太陽報
今個星期五會上演上季賣地計劃嘅壓軸重頭戲，今次會有三幅啟德新發展區限量住宅地一炮過截標。不過，咁啱兩幅屯門限量地上個星期以破底價賣出，有測量師又削減啟德地皮估值，但劉Sir覺得呢區長遠發展幾有保證，相信經已「插旗」嘅中國海外（00688），同埋長實（00001）等一眾發展商，都會伺機入標競投，三地估值最多約95.31億元。
劉Sir話畀大家知，上述啟德第1I區1至3號地盤限量地，係上季賣地計劃最後三幅地皮，亦都係最大嘅三幅，地盤面積約9.45萬至10.92萬方呎。
限量地涉二千六伙
地積比率先前更獲政府一律由4.5倍，調升至5.5倍，總樓面大約51.98萬至60.08萬方呎。作為限量地，呢三幅地皮亦要提供唔少過805、855同埋930個單位，共涉近二千六百伙。近排樓市回軟，啱啱批出嘅屯門震寰路及良德街兩幅限量地，更創咗區內近十二年新低價。
劉Sir知道，兩幅屯門限量地上個星期以破底價賣出，已經影響到啟德地皮估值被調減多達約16.7%，由每方呎樓面地價約6,000元，減至約5,000元市場下限水平，即係每幅估值約25.99億至30.04億元。
不過，都有測量師睇好呢區長遠發展。美聯測量師行林子彬就話，啟德地皮位置上同屯門有明顯差別。
佢仲話，就算屯門地低價批出，都未必會減弱三幅啟德限量地嘅吸引力，作為市區大型新發展區，將來又有鐵路沿線優勢，睇怕中大型財團都有興趣競投。
恒地信置料會入標
劉Sir覺得，眾多財團當中，中國海外競投機會較大，事緣財團去年六月以合共45.4億元投得該區第1H區1及2號地盤首兩幅「港人港地」，樓面呎價約5,427元及4,913元。長實、新地（00016）、恒地（00012）及信置（00083）等去年有競投嘅發展商，係入標投地嘅熱門財團。
至於市區重建局嘅土瓜灣馬頭角區新山道/炮仗街項目，就會喺今日截收發展意向。呢個項目係本年度第二個市區重建項目，提供約144伙，市場估值約5.67億元。
劉Sir