2015-03-04
太陽報
啟德新發展區係本港中長期土地供應嘅重要來源，政府喺兩年前已研究放寬該區發展密度。土木工程拓展署正式向城規會提交申請，劉Sir知道，今次申請放寬區內其中21幅土地密度，平均增約24%，當中13幅係住宅或商住地，涉及約莫1.08萬伙，相信全作私人住宅發展，較放寬前多出達56.9%。
城規會文件顯示，今次土木工程拓展署就啟德發展區其中21幅土地，向該會申請放寬發展密度，平均增幅大約24%。
有機會納入新賣地計劃
最新住用及商業樓面，將會增加到大約739.82萬以及489.66萬方呎，建築物的高限亦會放寬兩成至最高為主水平基準以上170米，而地皮有機會加插喺新賣地計劃入面。
申請放寬密度地皮當中有13幅係住宅或商住地，以位於啟晴邨以西嘅1E1同埋1F1區地盤規模較大，增密度後將會有1,687及1,645伙供應。
另該區1K1至3、1L1至3、4A1、同埋4B1至4區共11幅住宅或商住地，就分布喺前啟德機場停機坪以北同埋跑道區入面，每個地盤伙數介乎約481去到975伙，呢13幅住宅地嘅供應量，加埋有10,849伙咁多，比起原先計劃興建嘅6,914伙，足足多出3,935伙，增幅大約56.9%。
8商業酒店地一併申請
至於其餘申請放寬密度嘅地皮，包括位於前啟德機場跑道區5幅酒店地，增加地積比率後將提供301.94萬方呎樓面，提供4,004間客房。而另外3幅為商業用地，位置與譽．港灣相隔一條太子道東，其中兩幅會用作政府寫字樓同埋稅務大樓。
土木工程拓展署提到，為咗配合政府增加住宅同埋寫字樓供應嘅措施，該署已經探討提高啟德土地發展密度嘅可行性，研究旨在維持原有規劃意向同相關嘅城市設計理念。
總括今次建議方案，有關用地住用及非住用樓面放寬後，可增加約139.7萬同埋86.22萬方呎樓面，有關建議唔會對交通同環境造成不良影響，亦唔會對已規劃嘅基礎設施造成負荷。
另城規會亦收到工廈改裝商廈申請，上水寶運路21號第一電業大廈申請全幢改裝6層高商廈，寫字樓及零售樓面大約1.8萬及2.8萬方呎。