2014-10-28
經濟日報
香港除咗樓價貴，車位租售價都高企，部分車位月租足夠租個新界區細單位，好似一向車位極短缺嘅西區寶翠園，近期發展商分批將出租嘅車位拆售，車位租盤自然更緊絀，有投資者啱啱買咗個車位無幾奈，就以約8,000元成功預租，月租足以承租屯門時代廣場嘅一房單位。
寶翠園車位拆售約一個多星期，好快已經錄到預租個案，劉Sir聽到市場消息話，屋苑一個7樓單號車位，以每月約8,000元獲預租，平咗呢個盤自己嘅紀錄，相信係港島西區月租指標，若果以購入價約295萬元計，租金回報率都有約3.3厘。
同層另一個雙號車位都以月租約8,000元預租咗。而市傳獲預租嘅車位之中，最高月租約8,800元，由於唔憂承接力，所以據聞有個別車位月租叫價約1萬元。
依家一個港島區車位月租，分分鐘可以租到一個新盤區細價樓，好似屯門時代廣場一房單位，實用面積272方呎，月租都係約8,000元左右。
電單車位貴89%摸出
車位除咗租金可觀之外，個別屋苑車位近期價格升幅都好癲，炒風更加去到新界北。駿昇置業馮宇成話，上水御皇庭有個雙號車位，上個月由投資者以約65萬元買入，之後隨即放摸售，最近終於由同屋苑業主以約71.8萬元買入，即係揸咗一個月內就摸出，帳面賺約6.8萬元或約10.5%。另外，忠誠拍賣下個月會推出九龍塘又一居一個銀主車位，開價38.8萬元，比市價低約兩成。
睇番資料，九龍塘星輝豪庭有批電單車位，九月買入無幾奈就以90萬元摸出，個價幾日就升咗89%，呢批車位今日再係拍賣會推出，開價115萬元，較購入價再高約28%。
上季買賣飆逾七成
由於今年有唔少發展商趁市旺賣車位，所以住宅車位登記量都創新高，中原地產嘅數據就睇到，第三季整體住宅車位買賣登記有2,518宗，總值23.98億元，兩個數字都創咗七個季度新高，若果同第二季相比，亦都大幅升咗75.8%及59.4%。
期內最多車位登記係新蒲崗康景樓，計落有506宗，總值4.07億元。
劉Sir