2015-03-03
太陽報
樓市仍然好旺，近排中聯辦亦趁勢換貨。早前賣出九龍塘約道物業，再向發展商購入西營盤全幢住宅樓花鉑峯之後，上月初再沽出上環信德中心寫字樓同車位，其中車位賣出價更高達400萬元，料創全港商廈做價最高。另外，美聯工商舖（00459）話新辣招對工商舖影響唔大，今年睇好核心區商廈售價可以上升15%。
劉Sir發現，中聯辦近月有唔少物業買賣換貨動作，去年以近2.4億賣出約道6號後，緊接再以4.8億向恒地（00012）購入西營盤全幢住宅樓花鉑峯。
而上月初亦以合共1.45億元售出信德中心西翼高層10、11及12室，以及1個車位，其中車位個價高達400萬元。
根據土地及公司註冊處資料，NEWMAN INVESTMENT COMPANY LIMITED 持有嘅上環信德中心6樓雙號車位，以400萬元沽出；新民置業董事包括李文澤及李載林等。
據悉，該批人士係中聯辦高級官員。市場人士話，該車位成交價料係本港最貴商廈車位。
近年車位真係炒到癲，不少持貨十零、廿日已經執到幾十萬元。劉Sir睇到土地註冊處登記，有個投資者今年一月下旬以97.3萬元買入一個大埔溋玥．天賦海灣B1層雙號車位，揸咗約莫十九日，就閃電以146.88萬元賣出，火速升值近51%，帳面執咗近50萬元。
iPlace四日套逾半億
雖然上周五政府推出咗新辣招，但劉Sir發現，對工商舖物業影響微乎其微，就好似金朝陽（00878）嘅葵涌樓花工廈項目iPlace，喺辣招推出至尋日共四日，已經賣咗17個單位，套現超過5,600萬元。
美聯估核心區漲價15%
美聯工商舖行政總裁黃漢成話，今次辣招都唔係針對工商舖物業，預計影響唔大，今年就睇好核心區商廈，過去兩年升幅都落後大市，加上近期滬港通及深港通等概念，供應量同空置率低，料核心區商廈售價年內上升15%，呎價可再創新高。
但喺舖位方面，因為受到近日示威活動影響，原本看好嘅非核心區舖位好似元朗及屯門區，預計售價升幅由8至12%下調至5至6%，而家就睇好有鐵路概念嘅土瓜灣及紅磡區舖位，料有上升空間。
另外，市場消息話，億京持有嘅觀塘成業街10號地下數個舖位，獲買家以1.75億元洽購，而中環利源東街單號全幢亦獲買家洽購，叫價約1.5億元。