2014-10-27
太陽報
過去幾年樓市氣氛熾熱，好多財務公司都參與做物業按揭，而唔少業主亦會向呢類公司加按物業融資，不過近排樓價升勢同整體經濟都放緩，市場開始有業主出現斷供情況，銀主盤數量亦有所上升。今個月有代理行就受單一財務公司委託，一口氣增加咗11項銀主放盤，開價涉及共逾6,000萬元。劉Sir計計數，單係過去兩個月，喺拍賣場推出嘅銀主盤就多達32項。
今個月有代理行單次新增咗11項銀主盤，當中唔少仲係細價銀主盤，涉資開價加埋逾6,000萬元，好似西環景閣有個低層B室，實用面積約440方呎，銀主開價約580萬元，呎價約13,182元；而紅磡黃埔新邨樂貴樓低層1室，實用面積約445方呎，開價約528萬元，呎價約11,865元。
住宅為主 價細受捧
睇番市場近呢兩個月，推出拍賣嘅銀主盤明顯增加，至少有約32項，當中大部分係住宅，約莫佔咗20多項，期內都係細價銀主盤最搶手。
好似粉嶺華明邨中層1室銀主盤，雖然係事故同層戶，但都有約9至10組客競投，最終承咗32口價，以166萬元自由市場價拍出，比開價高咗超過四成。
對於近呢幾月銀主盤增加，卓先測量師行聯席董事潘子明話，相信呢啲物業主要來自財務公司有關，事關近年財務公司數目增加，有部分業主由於同時持有多項債務，唔能夠向銀行申請做按揭，所以會轉向財務公司加按物業。
另外，亦都有啲業主會去財務公司加按物業融資。過去幾年樓價大幅上升時，業主可以將物業多次加按，但係當樓價升幅有所放緩或無咩升幅嘅時候，斷供情況就好易出現，銀主隨即要求拍賣物業。
無力抵債 半契照拍
有物業拍賣師同劉Sir講，現時市場銀主盤有增加嘅趨勢，主要係斷供情況有所上升。
至於點解會斷供，其實有好多原因，好似兩人揸住嘅物業，其中一方經濟出現問題，將自己嗰份業權攞咗去抵押借錢，最終冇錢還，就會成為半契銀主盤；另有個別業主或因個人公司經營不善或投資失利，無力抵債，畀銀主申請拍賣物業。
劉Sir