2014-02-14
太陽報
新盤劈價、連政府賣地都跌價，二手業主仲「頂得順」？市場就接連錄得損手出貨個案，包括西南九龍瓏璽有個低層單位，市傳內地業主帳面蝕成65萬元，都要沽出呢個收緊租嘅單位。將軍澳領凱極高層四房單位，揸貨大約三年，帳面都要蝕約62萬元。
劉Sir收到個消息，呢個瓏璽2座低層單位，建築/實用面積約1,343/1,061方呎，依家仲有租約，之前減到2,250萬元放盤，近日個單位好似賣到約2,200萬元甩咗手，建築/實用呎價約16,381/20,735元。
領凱三年蝕62萬
聽講原業主係內地客，喺一一年用個人名義以約2,265萬元買入，依家轉手帳面都蝕咗65萬元。其實尋日瓏璽有個銀主盤喺私人拍賣會拍賣，低市價約20%推出，結果都無人吼被收番。
利嘉閣鄭健沐就話，領凱都有蝕讓，有個9座右翼極高層C室，實用面積1,001方呎四房套房加工人房，一一年買入價都要872萬元，啱啱賣咗810萬元，實用呎價約8,092元，帳面蝕成62萬元。
市場消息，上水歌賦嶺有間洋房，三個月「賣三次」，話說洋房上個月「賣殼」賠訂賣貴140萬元，賣咗2,470萬元，點知又畀買家撻訂，卒之又傳再賣番約2,300萬元，兩年間帳面蝕咗約100萬元。
至於屯門呢個「災區」。祥益黃慶德講，屯門已經有兩、三成放盤減價，其中新屯門中心3座低層C室，減價15萬元，以255萬元易手，實用呎價約5,519元，低市價大約2%。
帝庭軒減15萬賣出
利嘉閣關騰達話，東涌東堤灣畔5座高層D，賣500萬元，實用呎價約9,434元，低市價7%。
中原陳永強話，粉嶺帝庭軒3座高層F室，減15萬元賣485萬元。
但係凡事都有「例外」，所謂「百貨撞百客」。中原王昭康同劉Sir講，鴨脷洲深灣軒2座中層海景單位，減50萬都賣咗950萬元，單位實用呎價去到約1.62萬元，破晒標準單位成交新高。
劉Sir