2015-02-27
太陽報
新賣地計劃出爐，多年嚟都係「曬太陽」嘅前啟德機場跑道南端「酒店帶」終於有眉目。首幅啟德酒店地將會喺一五及一六年度嘅下半年推出，但喺旁邊開咗不足兩年嘅郵輪碼頭相信要再等吓先有配套支持，呢幅地皮市場估值約20.1億元。另政府下年度亦會推4幅商貿地皮，其中3幅係新增，但都喺非核心區，如元朗、葵涌同長沙灣。
位於啟德第4C區5號地盤的酒店地，佔地約10.05萬方呎，總樓面約40.2萬方呎，估值約20.1億元，呎價約5,000元，亦係啟德酒店帶六幅地皮中，首幅推出嘅地皮，當然，隔籬郵輪碼頭仍然要等等，相信仲要等幾年先會有酒店配套。
元朗商貿地料建地標
泛海國際（00129）執行董事關堡林同劉Sir講，香港始終係旅遊中心，目前酒店供應不足，故睇好未來酒店需求，集團對啟德酒店地有興趣，由於地皮位處市區，位置理想，交通方便，相信有利吸引來港購物旅客入住。
另外，新增嘅三幅商貿或商業地皮相信都可以帶動同區市況，其中元朗嘅東頭工業區宏業西街與康業街交界地皮，相信喺好多年來區內首次推出嘅商貿地，佔地約9.9萬方呎，總樓面約94萬方呎，估值介乎約20.7億至26.3億元，呎價約2,200至2,800元。
而長沙灣瓊林街商貿地皮，佔地8.3萬方呎，總樓面面積約99.7萬方呎，估值約39.9億至50.9億元。
另外，葵涌大連排道商業地皮，佔地1.3萬方呎，總樓面面積約12.4萬方呎，估值約5.2億至5.9億元。
劉Sir聽聞市場都幾睇好批商貿地皮，美聯李鎮龍話，今次政府推出非核心區嘅商貿地皮，對區內商廈有正面作用，今次最睇好元朗商貿地，因為呢區好多年未有地皮推出，好有「新鮮感」，估計地皮發展後，將會喺區內指標建築物。
利嘉閣何紹榮話，三幅地皮位於非核心區，算係「邊皮位置」，但相信政府會帶頭搞好配套，發展商會趁早入市，預計區內10億元以下嘅全幢物業成交增加。
誠品進駐太古城巨舖
零售商場又有大變動，太古地產（01972）稱，誠品書店進駐太古城中心，店舖面積約4萬方呎，預計明年初開幕，而現租戶永安百貨將於八月約滿後遷出。
另一方面，商廈交投轉旺，中原徐志聰同劉Sir講，中環環球大廈24樓02至05室三相連單位，面積約7,603方呎，成交呎價2.95萬元，涉資約2.2億元。