2015-02-25
太陽報
早幾年唔少內地人嚟香港買樓，大部分單位呢幾年已經大幅升值。地產代理老友同劉Sir講，舊年喺豪宅市場，內地個人賣家佔比例首次升穿一成水平。雖然同期個人買家比例都有增加，但增幅就唔及賣家多，反映部分內地投資者正逐步退出香港豪宅市場。
中原地產研究部黃良昇話，佢地公司統計，舊年1,200萬元或以上豪宅買賣個案中，內地個人賣家佔宗數10.1%，佔金額就有11.7%，呢兩個比例係○七年有相關紀錄以嚟最高，按年分別升咗3個百分點同4.2個百分點。
帝峯君滙沽得最勁
據統計，已知內地個人賣家較多嘅豪宅屋苑，有西南九龍帝峯．皇殿同奧運站君滙港，分別有13宗同14宗，涉及物業成交總值約2億同1.3億元。
另外，西南九龍瓏璽同西區寶翠園，都有約6宗同7宗呢類個案。
睇番二○一三年，比較多內地賣家嘅豪宅，都係帝峯．皇殿同寶翠園，不過，當時奧運站一號銀海同港島南貝沙灣，都有唔少內地人捧場，所以當年都錄到約5宗同4宗同類個案。
至於內地個人買家方面，黃良昇話，舊年比例同樣都升咗，全年此類買家佔宗數比例16.6%，佔金額比例18.7%，兩個比例按年都升咗2.3百分點，升幅相對賣家比例細，反映去年部分內地業主開始沽售香港豪宅，結束喺香港的投資。
新春長假過後，但市場可能仍然受節日氣氛影響，所以成交暫時仲係集中2,000萬元以下個案為主。
尚翹峰1280萬開齋
此外，中原李展恆話，灣仔尚翹峰今個月終於開齋，屋苑2座一個高層B室，建築/實用面積873/644方呎，以1,280萬元賣出，建築/實用呎價約1.47萬/1.99萬元，原業主揸咗七年幾，帳面賺579萬元。
該行柳發利話，新年氣氛濃厚，交投步伐放慢，今個月馬鞍山天宇海暫時錄到約5宗成交。
柳氏仲話，天宇海新近1A座高層A室，建築/實用面積1,255/944方呎，屬四房間隔，最近以1,050萬元連租約賣出，建築/實用呎價約8,367元/1.11萬元，個單位四年幾升值140萬元，依單位現時月租23,500元計，料租金回報率約2.7厘。