2015-04-16
太陽報
繼去年領匯（00823）兩度成功以近30億元售出9個商場之後，劉Sir知道再有房託基金一炮過推出4項物業招標，陽光房託（00435）透過代理公開招標出售四項分別喺北角、香港仔同埋尖沙咀嘅物業，相信佢哋旨在重整旗下物業組合，據有關公告資料，該批物業評估值合共7.122億元。
第一太平戴維斯資深董事莫偉豪同劉Sir講，陽光房託委託佢哋獨家代理標售4項物業，截標日期係下個月嘅二十六日。該批物業係尖沙咀恒港中心全幢，樓高21層，建築面積約28,558平方呎，包括物業地下至1樓零售用途，3樓至20樓則作寫字樓用途，單位面積由708至1,461方呎不等。
套現或回購基金單位
據陽光房託公布物業截至去年底的評估值約1.93億元，另同區百利商業中心地下共60個地舖，可出租面積共約7,934平方呎，面積由93至236方呎，物業評估值約1.258億元。
港島區亦有兩項物業，包括香港仔裕輝商業中心地下多間舖位及各層多個寫字樓單位，是次推出約67%不分割份數業權，可出租面積共約40,703方呎，物業評估值約2.34億元。
另外，北角御皇臺地下11個舖位連一樓及二樓共49個車位，物業評估值約1.594億元。
劉Sir計一計，原來上述物業評估值加埋共7.122億元。佢哋發言人話，今次出售物業目的為咗反映物業組合嘅真實價值。出售所得或會用於回購基金單位，以增加基金單位持有人嘅回報。
其實房託基金換貨早有前科，就好似領匯上年就兩度標售共10項商場，其中9個商場成功售出，涉及約29.55億元，當中不乏高於估值成交，其中彩霞邨商舖物業售價較估值更高近八成。
書店洽租星光行三層
另外，劉Sir打探到，佐敦彌敦道一個由連鎖鐘錶店承租嘅舖位諗住退租，個舖面積約2,500方呎，業主就啱啱以月租150萬元喺市場放盤，聽講只要一有新租客入場，舊租客就立即搬走。
消息指尖沙咀星光行三層樓面，面積5萬方呎，獲大型書店以逾200萬元洽租。
北角秀明69車位拆售
另旺角西洋菜南街雙號地下7號舖，面積約800方呎，傳獲手機店以50萬元續租，較舊租只升21%。
港置陳偉材話，北角秀明中心69個車位拆售，獲約100個認購登記，周五賣。
劉Sir