2015-04-15
太陽報
天水圍嘉湖山莊有複式單位以1050萬元成交，創屋苑九七年後售價新高。
天水圍二手樓賣一千萬元再唔係「夢想」，等咗十八年嘉湖山莊再有複式單位，賣成1,050萬元。除咗創下屋苑九七年後售價新高，更係全區九七年後再首錄千萬元成交。
嘉湖山莊一向係細價樓指標，中原馬斯力同劉Sir講，近排屋苑走咗個大複式單位，呢個景湖居頂層複式單位，實用面積1,407方呎，仲有天台，原業主因為搬去新盤，將個單位放售，之前叫開1,080萬元，近日賣咗1,050萬元，實用呎價7,463元，創九七年後屋苑成交價新高。
同時仲係十八年來天水圍區第一間過千萬成交，原業主九五年買入個單位，約廿年升值1.43倍。
劉Sir諗起九七年樓市炒到最癲嗰陣，大把人排隊買嘉湖山莊，嗰陣至少有3間同類複式，炒過一千萬元，最貴嗰間麗湖居賣到成1,085萬元。而今次外區客過千萬買呢個全米埔景複式單位，有大型銀行網上估價逾1,270萬元，其實複式單位放盤唔多，成個屋苑加埋唔夠10個，最貴已經叫到1,200萬元。
公屋鳳德邨呎租46元
公屋納米單位租到癲價，富誠地產陳錫金話，黃大仙鳳德邨碧鳳樓低層實用面積147方呎單位，無間隔，租咗6,800元，實用呎租46.3元，貴過私樓之餘，隨時係全港公屋最貴呎租，用一三年買入價80萬元計，回報多過10厘。
陳氏又話，牛池灣居屋瓊山苑C座中層單位賣420萬元，實用呎價9,677元，為屋苑最貴兩房。利嘉閣彭錦添話，青衣居屋青泰苑D座中層戶賣423萬元，實用呎價10,549元係高價。美聯梁岳宏指，同區盈翠半島3座高層戶賣1,018萬元，實用呎價1.32萬元亦係高價。
花都減六口價甩貨
睇下土地註冊處，沙田溱岸8號2樓單號車位賣245萬元；記得同屋苑車位之前賣230萬元係全新界最貴車位，今次又一次創新高。
市場都有人減價，六福行陳桂新話，粉嶺花都廣場3座中層H室，約一個月減咗六口價成30萬元，先賣到398萬元，實用呎價約1萬元。
金龍地產話，上水居屋翠麗花園1座低層三房單位，近排以低價355萬元賣咗，低市價10%，實用呎價6,017元。
劉Sir