2015-04-14
太陽報
近排豪宅交投暢旺，劉Sir睇番咁多年，政府產業署一向因應市況出售過剩嘅政府宿舍物業，署方一三年就停止出售宿舍，到舊年恢復番，賣咗23個物業，套現4億。今年產業署就明顯加快步伐，年初至今暫已售出共56個物業，收益超過12億元，比一四年全年收益，還高出兩倍，已為○九年後新高。去年該署出租宿舍收入1.599億元，按年少約3%，為一一年後最少。
產業署趁市旺出售過剩政府宿舍，劉Sir知道，佢哋喺今年二月初就推出咗10個港島區豪宅單位拍賣，其中港島薄扶林碧瑤灣佔咗5伙單位，大坑愉富大廈亦佔咗3伙，套現約3.2億元，同月該署又攞咗九龍郝德傑道8至10號出嚟招標，涉共46個單位，最終由香港大學以9.01億元購入。
署方年初至今做咗兩次招標同拍賣，已經售出56個宿舍單位，收益12.21億元，較舊年全年收益4億元，還大幅多出兩倍。
去年租金收入微跌3%
值得一提嘅，署方喺一三年曾經因市場情況暫停出售有關過剩宿舍單位，到一四年下半年才重新出售有關物業單位，舊年共售出23個宿舍單位，其中碧瑤灣佔7伙最多，涉及金額約2.2億元，佔全年嘅收益一半以上。劉Sir計一計數，該署喺一四年至今，售出唔少豪宅單位，熱門屋苑包括碧瑤灣佔12伙單位，愉富大廈有5伙。
據該署最新資料，去年該署共租出298伙宿舍單位，比一三年增加咗3伙，租賃務表現都算平穩。不過，劉Sir發現，雖然舊年出租單位數目按年略為增加，但涉及嘅租金收入就輕微下跌，錄得1.599億元，較一三年1.647億元，按年減少咗480萬元或約3%。
騰出四地年內轉用途
此外，政府近年積極搶地建樓，但喺現成可供發展嘅住宅地皮唔係好多，今年產業署計劃騰出另作處置、重新發展或作其他用途嘅土地數目共有4幅，土地面積合共約22.1萬方呎，較舊年約11.1萬方呎，多出近一倍，當中只有2幅作私人住宅發展，包括地盤面積最大、近13萬方呎嘅屯門前哥頓軍營。
劉Sir