2014-02-06
太陽報
近年內地旅客多咗去元朗消費，唔少投資者都睇好嗰區零售市道，都密手買舖投資。計番過去一年，該區過億元商舖買賣有5宗，成交金額加埋超過7億元，買賣熱鬧之情況可媲美九龍二線區。其中，一向以食肆為主嘅元朗又新街，一個依家由酒樓租緊嘅地舖同一樓等樓面，早排畀林姓投資者以約1.4億多元買咗，聽講佢諗緊「劏細」拆售，入場費約200萬元。
依幾年唔少內地旅客都鍾意去新界北掃貨，唔少畀得起租嘅連鎖大型零售化妝品店及藥房等，都爭住喺該區開分店，租金自然飆升，所以好多投資者都喺區內買舖。
又新街錄億四交易
劉Sir計過數，過去一年，元朗罕有咁有5宗金額過億元嘅商舖買賣成交，成交金額加埋約7.15億多元。
喺家陣雙倍印花稅措施下，仲有如此佳績，反映投資者對該區零售後市有信心。
其中，又新街37至51P號地下7號A舖同埋1樓等樓面，面積約1.17萬方呎，林姓投資者今年初以約1.475億元購入，依家該段街仲係以茶餐廳以及酒樓為主，相信日後會愈來愈多連鎖商店進駐。
所以上址新買家都兩手準備，依家每月收緊酒樓租金近26萬元，租金回報約2.1厘，同時間都諗緊分間拆售，預計拆約100間舖，每間建築面積約100方呎左右，入場費約200萬元。
大馬路街舖最搶手
過去一年，元朗5宗大額商舖成交中，3宗都喺大馬路嗰段（即是青山公路元朗段），該段街商戶包括連鎖運動用品、時裝店同埋電器用品店等，所以街舖特別搶手。
其中早於一二年遭棄購嘅該95至97號地下及1樓，舊年三月以2.08億元重售，以面積約3,600方呎計，平均呎價約5.8萬元。
另外，里昂證券旗下基金或有關公司上月底推出拆售嘅銅鑼灣羅素街8號10至20樓共10層，依家已收到幾倍超額認購。
聽講最快日內發售，該批樓面折實後平均呎價2.8萬元起。