睇樓用眼睇 更要用耳鼻「睇」

撰文:蘭茜 欄名:樓市放大鏡 一般人睇樓主要睇單位內籠間隔、坐向、樓層及景觀，房間大細，廳位是否夠用，總之各取所需。 事實上，買樓除了睇單位內籠，以及經濟預算外，原來，還要顧及外圍因素，要出動嗅覺和聽覺。 蘭茜接觸過部分搵樓客睇樓相當認真，研究家具如何擺位，才是最見用，更會思量睡房內可以擺幾多呎床？能否一併安放BB床？又或是可以安放幾多呎櫃等等細節問題。 入屋嗅一嗅 有沒有怪味 至於，點解要出動嗅覺睇樓，皆因是要清楚了解外圍環境，嗅一嗅有沒有怪味。有搵樓客同蘭茜講，曾經參觀一個新樓單位，入屋後聞到一陣陣類似垃圾味，對單位即時大打折扣，即使單位價錢幾平，也不作考慮。另一個搵樓客睇了一個低層單位，入屋後打開窗戶時即聞到油煙味，全因為單位樓下開設了多間食肆，睇樓時正值午膳時段，難免多鑊氣，油煙味隨風由下而上。 外面聲浪大 關窗損健康 除嗅覺外，也要出動聽覺，若物業比鄰為馬路或是主要幹道，終日車來車往，若是小夫婦或經常要出差的人，因為他們大部分時間外出工作，甚少在家，盡管外面車水馬龍也不會有太大問題。但對小孩子和老人家家庭則有所不同，他們經常在家，外圍車聲太嘈的話，窗戶就要經常關閉，難有新鮮空氣，對他們身體百害而無一利。 另外，還要聽下有沒有飛機聲，是否飛行航道？話說一名居於深井區業主正正因為飛機聲浪太頻密而影響身體，導致精神緊張，染上病來。 該深井區業主非常滿意目前的居所，奈何受到飛機聲困擾，曾想過搬屋，由於合心水單位難求，始終未遇上合意單位，故惟有在現居所窗戶加重裝備，安裝雙重玻璃門，務求以減低聲浪。 無可否認，現在盤源有限下，現時搵樓客可能未必有樓睇，就算有樓睇可能是樓上樓下，又或是相若間隔單位，但外圍環境也可以在不入屋之下，進行偵察，下次睇樓時不妨留意這些細節。