2015-02-13
太陽報
眨下眼農曆新年就快到，呢排各大發展商爭相趕住出嚟總結去年賣樓佳績，順便預先「晒冷」講吓羊年賣樓大計。尋日恒地（00012）透露，恒基物業代理營業（一）部舊年賣咗約2,640伙，金額超過218億元，連埋營業（二）部計，公司全年售樓金額又破頂，超越○七年所錄220幾億元最高紀錄，今年售樓金額勢再破200億元。
尋日劉Sir去咗恒地營業（一）部新春團年活動，身為部門主帥嘅營業（一）部總經理林達民話，旗下恒基物業代理營業（一）部舊年成績驕人，全年賣出約2,640個單位，銷售金額逾218億元，突破原定160億元嘅目標。
林達民：六項目備戰
佢仲話，連埋營業（二）部成績計，恒基物業代理舊年嘅銷售金額，就突破咗集團二○○七年所創下嘅220多億元歷來最多紀錄。
至於舊年嘅銷售金額就主要來自馬鞍山迎海各期，以及元朗尚悅等樓盤。其中，單係迎海各期舊年嘅銷售金額已經超過120億元。
林達民又透露，佢部門今年部署開售6大新盤，涉及大約1,135伙，目標銷售金額維持返160億元。
當中土瓜灣馬頭圍道200號同九龍界限街曉珀．御，其中一個有機會喺首季內率先登場，今年亦都部署開售西灣河成安街33號、迎海第4、5期同埋西半山羅便臣道23至25號項目。
資料顯示，恒地營業（二）部今年亦將開售3個住宅新盤，涉及近900伙，即係兩個部門夾埋，今年將會推售超過2,000伙，銷售金額勢破200億元。
12樓盤新春照銷售
一如既往，恒地營業（一）部旗下12個樓盤於新春期間照常營業，繼續開放予公眾參觀，當中包括馬鞍山迎海及元朗尚悅等。
林達民認為，啱啱賣出嘅九龍筆架山地皮成交價「超貴」，日後每方呎售價料3萬幾元先可以「平手」。
佢又強調，上述地價只反映個別有條件地皮價錢，不代表全部地價上升。