2014-02-05
太陽報
次批白居二購買力上個月先真正起動，雖然無第一批白居二咁癲，見盤就搶，但都做到啲成績。睇番房委會資料，上個月全港公、居屋第二市場有約146宗買賣成交，按月爆升逾53%，宗數跌咗兩個月再上，仲創咗近五個月新高。呢班白居二人士喺新春期間亦都未停過，有買家跨年洽購油塘鯉安苑單位，終於成功以約409萬元買樓賀新歲。
上個月公、居屋第二市場逆市表現做好，慈雲山慈愛苑及天水圍天盛苑表現突出，錄到約6及5宗成交。但相比舊年六月第一批白居二購買力出現時，全月錄到約494宗買賣，交投就勁跌約70%。
買家跨年洽購鯉安苑
上個月約146宗成交當中，佔咗約27宗係公屋第二市場買賣，佔上月成交比例超過18%，相信係公屋入場門檻低，吸引買家購買。其中單是黃大仙公屋成交就有約9宗。
有代理同劉Sir講，有個別白居二買家，原本諗住買居屋單位，奈何居屋樓價升唔停，只好轉投公屋市場，唔少更出價進取搶盤，搞到連公屋樓價都推高埋。
好似黃大仙鳳德邨同黃大仙下邨，上個月分別有單位賣咗約235萬及220萬元，屬近月高價。
事實上，新春期間市場錄到唔少居屋成交。世紀21聯誠謝寶昭話，油塘鯉安苑E座中層1室，單位建築/實用面積約868/650方呎，過年前已經有次批白居二準買家洽購，新春期間終以409萬元賣出，建築/實用呎價約4,712/6,292元。
煜明苑綠表賣333萬
富誠地產林栢榮講，鑽石山宏景花園6座高層B室，新春期間獲綠表客以約373萬元買入，實用呎價約6,933元，呎價創同類新高。
將軍澳免補價居屋，新一年亦連錄成交。中原柯勇話，區內煜明苑C座高層3室，議價後獲業主減價12%，最終以綠表價333.82萬元賣出，實用呎價5,500元。
劉Sir