2015-04-02
太陽報
以前觀塘區係工廈嘅集中地，可惜依家市場對工廈用途嘅需求大減，唔少工廈地廠及單位已經轉型做服務或零售業，但係土地用途轉變就要向政府有關當局繳交「容忍費」，即係俗稱「補Waiver」，劉Sir知道現時政府收取「容忍費」昂貴，好似開源道雙號地下一個由銀行承租嘅舖位，租金約莫55,000元，但係「容忍費」竟高達65,000元，比起租金仲要高出近兩成。
劉Sir老友萊斯古仕賢話，工廈地廠如果想做商業用途，就要向規劃署及地政總署提交申請轉用途及「補Waiver」（容忍費），而容忍費幾多就視乎地政總署估價，通常每次申請期限係兩年，之後就可按季、按半年或一年繼續繳交容忍費；至於容忍費金額多少要視乎行業類別，當中以服務、零售同埋銀行最高。
佢仲話，觀塘區無論一線抑或二線街道，普遍每方呎容忍費都要去到54至56元，容忍費金額一般係物業作為工業及商業用途兩者嘅租金差距，而最終金額要視乎地政總署估價。萊斯唐俊龍就話，觀塘區內街舖嘅呎租平均大約60至70元。
銀行舖「容忍費」達六萬五
另外，開源道62號駱駝漆大廈1期地下一間銀行，實用面積約2,100方呎，租金約55,000元，容忍費就高達65,000元，對比租金仲要高出18%；另成業街雙號怡生工業大廈地下舖位，面積約3,300方呎，獲銀行以每方呎約70元租用，而容忍費就需要每方呎約30元，佔租金約莫43%，該銀行每月每方呎成本需要約100元。
劉Sir仲知道，興業街12號永泰中心地下一個舖位，實用面積大約400方呎，由服務及零售業以月租6萬元承租，容忍費約2.2萬元。
樓上舖「偷雞」 批發變零售
有市場人士話，觀塘區入面嘅工廈有大量樓上舖以批發用途為名，而同時間「偷偷地」充當零售角色，以避過補Waiver帶來嘅成本，呢類樓上舖主要以家居用品、家電、服裝及鞋類等產品為主。
佢話部分消費者已經慣咗去樓上舖購物，呢類樓上舖喺區內有至少100間，粗略以每間舖約莫1,000方呎計算，料總樓面面積10萬方呎「走唔甩」。