2014-02-04
太陽報
屯門係未來重點力谷土地供應嘅地區之一，區內震寰路與良德街交界、同埋良德街呢兩幅限量地，會喺今個星期五截標。劉Sir知道，單計屯門區嚟自改劃土地用途嘅住屋供應，未來五年就有3.26萬伙咁多。有測量師老友認為，如果區內供應都喺差唔多時間推出市場，對價格一定會造成壓力，所以預期兩截標地皮每方呎樓面地價約2,500元，估值加埋大約9.51億元，係市場最低估值。
政府啱啱公布嘅施政報告中，強調重點增加未來住宅供應，包括改劃土地用途等。劉Sir睇番立法會文件，原來透過改劃用途做房屋發展嘅土地數目有多達152幅，估計未來五年可提供21.5萬個單位，其中屯門區將是供應重災區之一，佔咗約3.26萬伙。
七住宅地去年獲批
此外，單計舊年政府批出嘅屯門住宅地就有7幅，係舊年批地數目最多嘅地區之一，以舊年初批出嘅屯門掃管笏路與管翠路交界限量地最具規模，總樓面大約37.69萬方呎，提供460至480個單位。
對於屯門將有大量住屋供應，理想城市張聖典話，未來供應大部分會嚟自新界區，呢方面其實都一早估到，其中屯門會有唔少供應，假設將來批地皮喺差唔多時間推出，個價就一定會有壓力。
基座難建大型商場
佢仲話，上述震寰路與良德街交界，同埋良德街兩幅限量地，可作住宅及商業混合式發展，不過項目基座好難發展大型商場，而住宅部分亦有限量條款，所以地價會睇淡少少，每方呎樓面地價估計約2,500元。
呢兩幅屯門地早前已經獲城規會通過放寬發展密度，總樓面增加咗大約兩成，劉Sir知道，震寰路同埋良德街呢兩幅限量地，如果用盡商業樓面，項目總樓面最高大約21.3萬及16.7萬方呎，限制不能少過370同埋290個單位，用樓面呎價2,500元計，估值就大約5.33億及4.18億元，屬於市場下限價。
綜合市場估值，兩地估值上限共達11.41億元。
劉Sir