2014-09-30
太陽報
樓價升唔停，睇番地產代理嘅數據，以118個屋苑做統計，截至九月二十一日，九龍區32個成分屋苑實用呎價全部已經升穿1萬元，當中剩番5個實用呎價低過1.1萬元，包括將軍澳東港城同九龍灣德福花園，而新界區依家仲有3個成分屋苑，實用呎價低過7,000元，最平係屯門海翠花園，實用呎價約6,614元。
中原黃良昇同劉Sir講，喺舊年五月，中原城市領先指數CCL入面，九龍區全線成分屋苑嘅實用呎價，都喺9,000元以上徘徊，嚟到依家，終於全部都升穿1萬元。
當中有5個屋苑呎價仲未破1.1萬元，其中東港城同德福花園，依家平均實用呎價分別約10,413元同10,428元，而紅磡黃埔新邨約10,851元。
好似細單位為主嘅九龍灣淘大花園，依家平均實用呎價都去到約1.2萬元，最近啲一房戶仲好搶手。
淘大兩年升值103萬
該行范鎮培話，有個外區上車買家見細價盤買少見少，於是加快入市決定，用373.5萬元買入屋苑L座低層3室，以實用面積322方呎計，實用呎價約11,599元，個單位兩年幾升咗103.5萬元。
如果要搵平貨，新界區依家仲有3個成分屋苑實用呎價低過7,000元，最平係海翠花園，實用呎價約6,614元，而新屯門中心同天水圍嘉湖山莊，實用呎價約6,766元同6,825元。
至於港島區成分屋苑之中，就只淨番香港仔中心實用呎價低過11,000元，最新報10,468元。
迎海一期高市價8%
其實新界屋苑，近期都頻頻錄到破頂價成交，世紀21奇豐趙詠欣同劉Sir講，受到馬鞍山迎海．星灣御即將開售帶動，迎海一期啱啱有個2座中層A室兩房單位以609萬元賣咗，以實用面積497方呎計，實用呎價約12,254元，唔單止高過市價約8%，仲創咗屋苑二手新高價，單位兩年升咗約兩成。
趙詠欣又話，個買家原本租住同屋苑2座一個較低層單位，見環境唔錯，諗住買番間屋做業主，但又驚新盤抽唔中，所以情願用略高價買入心頭好單位。
劉Sir