2014-01-30
太陽報
近排內地個人遊嚟港消費嘅勢頭，已經無先前咁洶湧，全幢工廈改建酒店嘅熱潮都慢慢褪減。劉Sir知道，舊年城規會批出嘅全幢工廈改裝酒店申請，啱啱好五隻手指數得晒，比起前年分別勁減58.3%。有測量師老友認為，嚟緊同類申請同獲批個案仲會逐步遞減。
政府喺二○一○年四月開始執行工廈活化措施，劉Sir參考城規會資料，原來實施初期全幢改裝酒店申請並唔活躍，要去到一一同一二年先明顯多咗，呢兩年分別錄得10及12宗同類獲批個案，涉及間房數就多達2,236及3,628伙。
黃竹坑項目後年招租
不過，工廈改裝酒店呢個熱潮，似乎已經去到「水尾」，因為舊年全年該會只係批咗5宗工廈改裝酒店規劃申請，對比一二年高峰期嘅12宗勁減約58.3%，講到房間數目，更按年萎縮咗多達77.3%，得返823間。
事實上，舊年獲批嘅改裝酒店個案規模唔係好大，最具分量已經係香港經貿商會會長李秀恒嘅香港仔黃竹坑道39號，同埋41至43號偉晉中心1期及2期，舊年九月一併獲城規會通過改裝兩幢酒店，提供166及176間客房。李氏早前同劉Sir講過，呢個項目改裝費每方呎約莫3,000至3,500元，可望喺一六年招租。
投資者轉軚搞寫字樓
對於工廈改裝酒店個案顯著萎縮，老友高緯環球張翹楚認為，內地旅客對本港旅遊業一向有好大推動作用，而內地個人遊消費增長明顯無以前咁強勁，再加上工廈喺規格上亦唔係幢幢啱改裝酒店，所以工廈改裝酒店批出數字減少並唔出奇，預期嚟緊仲有得跌。
過往都有部分獲城規會通過改裝酒店嘅工廈活化項目，「臨門一腳」轉軚搞寫字樓，好似李秀恒嘅葵涌運通製衣大廈，前年獲准改裝酒店，提供598間客房，但舊年已簽立特別豁免書作寫字樓用途。