2015-03-23
太陽報
政府近年致力增加土地供應，但礙於本港土地資源有限，要提高住屋供應嘅效率，就要用空間換取單位。劉Sir知道，本年度透過賣地同埋私人協約批地嘅供應大約有17,323伙，創過去十幾年有紀錄最多，而涉及土地面積就大概470.4萬方呎。換句話說，即係平均每272方呎土地就製造到一個單位，對比上年度約435方呎先有一個單位，以較少的土地提供單位，係供應最有效率嘅一年。
劉Sir睇過地政總署嘅數據，喺今個財政年度透過賣地同埋私人協約批出嘅土地，面積加埋達約470.4萬方呎，合共提供約莫17,323個單位，供應比起對上一年錄得大約10,456伙，大幅增加咗約65.7%，仲係過去十幾年有紀錄最多。
為咗保障土地可以有足夠單位供應，今個年度批出唔少限量地，增加私宅供應效率同埋達標機會，劉Sir以平均每個單位所需要嘅土地面積去計算，原來只需要約272方呎土地，就足以製造出一伙供應。
新地天水圍大增伙數
好似上年度就以約435方呎土地換取一個單位，而○九年平均6,596方呎土地先供應到一個單位，差幅更加超過95%，同時係過去十幾年用最少土地，供應最多單位嘅一年。
事實上，本年度批出嘅住宅地不乏大型限量項目，好似新地（00016）舊年七月連環投得嘅天水圍第112區及115區限量地，限建合共唔少過2,470個單位。
劉Sir知道，其實發展商早排向城規會提出規劃申請，呢兩項目計劃興建共約4,112伙，所以實際供應量將較地契所限更多。
人均居住面積恐擠迫
就算政府最近無再就住宅地加設限量條款，但喺迷你單位盛行嘅時代，相信發展商會繼續以最少空間換取最多嘅單位量。老友高緯環球張翹楚就覺得，發展商喺無限量條款下仍主動興建中小型單位，係大勢所趨。
佢預期每年實際供應達標問題唔大，但要關注人均居住面積會唔會太過擠迫。