中港通關，零售業可謂一天都光晒，但昨日卻傳出有老牌百貨公司結業消息。貴為尖沙嘴地標之一的崇光百貨（SOGO）因租約期滿，將在三月結業，近日就推出了「結業大激減」益街坊。不過，支持者不用失望，母公司利福國際就話，銅鑼灣SOGO不受影響，遲些啟德旗艦店亦將會開幕。
尖沙嘴SOGO推出了一連兩周「結業大激減」，大量貨品低至半價，又有信用卡加碼優惠，實行要錢唔要貨。許多市民興奮之餘，亦很關心結業消息，感歎捱得到開關，卻要關門大吉。
利福昨日就解畫，因為租約期滿，尖沙嘴SOGO只會營業至三月十二日。不過，SOGO粉絲唔使擔心，另一旗艦店崇光啟德將會誕生。其實利福早年已經在東九龍部署，早年投得啟德「雙子塔」項目，將會引入商業、娛樂、餐飲等設施，亦即是啟德SOGO選址。
講開市道，利福認為中港通關後，短時間內地旅客對本港零售業幫助依然有限，然而隨住兩地人流物流資金流進一步復常，相信就可對行業起正面作用，所以利福仍然維持香港零售業前景審慎樂觀。
SOGO本身是日資百貨公司，在一九八五來港，最先落戶銅鑼灣，但千禧年時日本母公司進入破產保護，此時「大劉」劉鑾雄家族聯同「彤叔」鄭裕彤以逾三十五億元，收購香港SOGO業務連銅鑼灣崇光百貨整幢物業。尖沙嘴SOGO於二○○五年開幕，中間曾在同區轉移陣地，現時身處喜來登酒店內。