2014-09-23
太陽報
細價樓成為樓市至寶，而屯門樓一向多人買嚟上車，加埋屯門南延線概念，呢排成個區樓市起哄，居屋兆禧苑有個辣招盤業主，難敵癲價吸引力，即使畀10%加強版額外印花稅都照沽貨套現，實用呎價7,721元更創屋苑新高。單位約一年升值34%，而呢個屋苑更加出現一日兩破頂情況。
中原陳漢文同劉Sir講，碼頭區兆禧苑一房單位，日前賣咗263萬元，已經係屋苑嘅自由市場新高。
佢仲話，點知同一晚有個C座低層16室，實用面積351方呎，原則係一房，依家已經間咗兩房，有投資者睇好後市，用271萬元破紀錄價買入，實用呎價7,721元，再創屋苑新高，個業主上年七月先入貨，扣埋10%加強版額外印花稅，揸咗年幾都賺41.9萬元。
市中心近乎無貨
祥益袁思賢話，屯門市中心盤源吸納得好快，現時接近無晒貨，屯門時代廣場E座低層有個撻訂單位，上星期初賣325萬元，之後俾人撻咗，六日後再賣322萬元；另同屋苑有個C座低層11室都賣咗330萬元，實用呎價約1.02萬元，呎價再破萬元。
新界細價樓繼續被人搶。美聯梁仲維講，荃灣荃威花園早排連錄2宗兩房買賣，其中A座低層戶賣成350萬元，實用呎價7,511元。中原姚智皓話，青衣屋苑今個月有55宗買賣，單是周末兩日都有8宗。
新元朗中心反價
成交多咗、樓價繼續升。中原招錦昌講，沙田花園城雅蘭閣高層C室以336.8萬元賣出，實用呎價12,567元破晒紀錄。
消息指，粉嶺帝庭軒7座高層單位賣521萬元，屋苑實用呎價過1萬元。美聯鄧涇渭話，元朗新元朗中心1座高層A室，反價8萬元，但投資者仍以468萬元照買。
將軍澳交投都好活躍，日出康城、君傲灣同維景灣畔最近都有買賣，就算公屋單位都出現高價，睇資料，景林邨景榆樓低層19室，賣咗318萬元，估計係屋苑新高，代理仲話個單位有租約。
另外，香港置業曾家輝話，長沙灣ONE NEW YORK嘅開放式單位，實用面積235方呎，依家有盤連租約叫緊388萬元，實用呎價要成1.65萬元。
劉Sir