2015-03-18
太陽報
近排車位受市場追捧，新界一手車位都賣成過百萬，低水二手車位自然就非常搶手。劉Sir尋日去咗個私人拍賣場，其中一個沙田富豪花園法院令兼無契嘅車位，開價只係25萬，吸引5組買家齊齊爭住舉手買，最後以39.5萬元賣咗，足足較開價搶高咗58%咁多。
忠誠拍賣尋日拍出富豪花園第一層一個無契法院令單號車位，開價25萬元，最後以39.5萬元拍出，較開價搶高咗14.5萬。美聯翁凱傑話，其實屋苑啲車位平均都係賣緊33至34萬元，之前屋苑連錄20宗車位成交，分別由3組買家購入。
海悅加價16萬獲承接
其實，呢個屋苑喺一○年嗰陣推出咗約莫500個車位，當時入場費都只係16萬元。另外，上周日新地（00016）粉嶺瓏山1號就推咗59個一手車位，即日賣咗38個，個別成交價去到138萬元，創北區車位售價新價。
另外，利嘉閣又話，將軍澳海悅豪園一個雙號車位，近日加價16萬至96萬元轉售，創咗屋苑車位售價新高，三年內升值69%。聽講今次紀錄較舊紀錄高咗超過10萬元。
商廈市場都好旺，中原陳權威話，觀塘萬兆豐中心一個上月曾撻訂嘅中層B室，面積約2,058方呎，再以約2,511萬元沽出，呎價約1.22萬元，創該廈呎價第二高紀錄。而上次撻訂呎價只係約1.1萬元。另據土地註冊處資料，金鐘海富中心中層04室以1.22億元售出。據悉，成交呎價約2萬元，較早前意向價低約5%。
粉嶺工廈標售值3億
另港置許諾謙話，北京同仁堂租緊嘅旺角通菜街158A至158C號明發大廈地下55號舖招租，可隨時交吉，面積約640方呎，意向月租約28萬元，呎租約438元。
工廈活化潛力咁優厚，吸引工廈業主伺機放售物業，第一太平戴維斯聯同高力國際代理標售粉嶺葉氏化工大廈，並會喺下月三十日截標，依家係一幢6層高工廈，總樓面約莫63,897方呎。
劉Sir知道，物業由葉氏化工（00408）持有，市場估值大約3億元。