2014-09-08
太陽報
港島區寫字樓租金今年已經連續兩季下跌，唔少企業就趁機會擴充或換位，搞到港島區出現近年罕見嘅換租潮。好似有一家金融機構原本租用中環和記大廈約3,000方呎寫字樓，近期就搬咗去金鐘太古廣場第2期，依家個寫字樓面積約2.2萬方呎，比之前大咗6倍。亦有律師行由原本租用嘅中區乙級商廈，「升呢」預租中環交易廣場3期全層寫字樓單位。
高緯環球香港商業部執行總監霍佐平同劉Sir講，近年唔少企業由核心區轉租非核心區，令到核心區寫字樓租金由高位掉頭回落，最近反而吸引到部分計劃擴充的企業，轉番去租啲「靚位」。
外資搬太古廣場慳租25%
好似有金融機構原本租用中環和記大廈約3,000方呎樓面，為擴充業務，新近就租咗太古廣場2期約2.2萬方呎樓面，呎租約90元，成功擴大租用樓面。
至於一間原本租用中環花旗銀行大廈兩層約3萬方呎寫字樓樓面嘅汽車生產公司，新近就租咗人流較旺嘅灣仔合和中心共3層樓面，涉及樓面約4.5萬方呎，呎租約45元。據聞嗰間公司仲租埋地下商舖。
聽市場講，有外資銀行早前以月租約288萬元租咗太古廣場3期共兩層樓面，以每層面積約1.6萬方呎計，面積共約3.2萬方呎，計落呎租約莫90元，比起之前租用中環友邦金融中心，若按現時市值呎租約120元計，搬遷後料可慳約25%租金開支。
律師行「升呢」轉租甲廈
世邦魏理仕話，有間律師行預租咗中環交易廣場3期一個高層全層寫字樓單位，面積逾1.1萬方呎，呎租約108元，相比市值呎租近120元明顯吸引，主要係租客背景同埋租期長達八年，所以業主同意畀啲租金優惠。
據聞，間律師行原本以呎租約80元租用中區乙級商廈差唔多樓面，今次可以成功「升呢」。
另一方面，美聯商業部營業董事羅仲英話，過去半年，中環皇后大道中9號同環球大廈呢類核心區商廈，都曾經出現呎租40多元嘅租務個案，租金同灣仔以及上環個別商廈差唔多，羅仲英相信未來可能會有更多企業轉租番去中區。
劉Sir