2014-09-05
太陽報
市區供應短缺嘅迷你戶同特色戶，租售價往往可以睇高一線。好似入伙無幾耐嘅西區高士台，最近有個開放式低層單位租咗，實用呎租高達83.3元，係個盤嘅新高，亦都比同屋苑其他類型嘅單位呎租唔夠70元高出一截。至於新世界（00017）嘅尖沙咀名鑄，有部分特色單位乘勢轉售為租，其中有兩伙相連單位月租更加高見19萬元，估計創咗尖沙咀市中心分層單位新高。
迷你單位近期唔單止做價理想，連租金都好突出。中原黃廷傑話，高士台入伙以來錄到幾宗租務成交，市場最近仲有一個迷你單位租出。
灣仔單幢 價超藍籌盤
上述單位係2座低層D室，實用面積約264方呎，租咗約莫2.2萬元，實用呎租高約83.3元，計落租金回報率超過4厘，相當唔錯。個盤近期都有其他單位租出，好似2座有個高層B室，實用面積約505方呎，租咗約3.4萬元，呎租約67.3元，表現反而唔及迷你單位標青。
除咗新樓之外，鄰近商業區嘅迷你單位都好受上班族歡迎，所以呎租都好理想。該公司李展恒稱，灣仔聖佛蘭士大廈低層B室，實用面積209方呎，係開放式間隔，附有全屋家具等，最近業主以1.35萬元租咗畀個外籍人士，實用呎租64.6元，呎租好過藍籌屋苑。另消息稱，紅磡黃埔花園2期17座高層A室，實用面積約388方呎，以月租約1.65萬元租咗，實用呎租約42.5元，相信係屋苑新指標。
事實上，租金升勢凌厲，有發展商乘勢將部分新盤單位轉售為租。劉Sir聽聞，名鑄依家得番29伙待售，全部都係相連或複式特色單位，早前曾經攞部分單位招標，但係最終因為買家出價未能反映物業質素而流標。
不過，就有唔少公司租客主動洽租單位，所以發展商數月前已開始將部分單位轉售為租，到依家已經租咗4伙，月租表現唔錯，每個介乎12萬至19萬元。
名鑄相連19萬獲承租
好似名鑄60及61樓B室兩伙相連單位，每戶實用面積2,969方呎，成交月租19萬元，實用呎租約64元。
依家名鑄仲有幾伙有租客洽租，其中面積3,855方呎複式單位月租，叫價最高27萬元，呎租70元，有機會再創新高。
劉Sir