2014-09-04
太陽報
依家買樓上車絕對唔容易，舊時只要唔怕遠，去屯門區仲有啲200萬元或以下私樓可以揀。但老友同劉Sir講，如果有心揀，就要快手，事關依家屯門區都只係得番7個呢類放盤，係首次出現個位數，創佢哋行一○年有紀錄以來新低。若果同舊年底比較更加少咗87%。而馬鞍山區400萬元以下私樓放盤，已經全部絕迹，預咗用10%首期入市嘅買家，相信好難喺呢區買二手私樓上車。
劉Sir同祥益班老友傾開，屯門區舊年年底仲有53個200萬元或以下嘅私樓放盤，但嚟到今個月就只係淨番7個，而且全部係單幢樓，相比上個月有16個，只係一個月就少咗56%。
業主趁勢放 價嗌高
一○年到依家係第一次見個位數放盤，計埋補咗地價嘅公屋、居屋，都係得10個放盤，若果預算資金鬆少少，250萬元或以下私樓盤就有91個，300萬元或樓下就有306個。
祥益謝澤銘話，其實近排個市係咁升，屯門區多咗業主放盤，前日單日收盤量多兩成，但由於租金都係咁升，所以依家就算新收嘅單幢樓放盤，叫價都唔會低過200萬元。
富誠地產陳錫金都話，現時東南九龍一帶地區，依家都係得番一、兩個唐樓高層放盤係平過200萬元，300萬元以下就有成30個放盤。
馬鞍山代理都話，區內新港城D座高層細兩房單位，剛剛賣咗398萬元，實用呎價約1.24萬元，依家成個區已經無晒平過400萬元、做到九成按揭嘅私樓放盤。至於同區海典居1座中層兩房單位，近期就賣到成640萬元，實用呎價1.14萬元。
太湖實呎價破萬元
至於藍籌屋苑，逾四十多年樓齡嘅荔枝角美孚新邨，美聯吳志輝都話，依家無450萬元唔駛諗搵樓，佢同事黃錦瀚話，沙田第一城就要340萬元。
另一方面，近期兩房單位做價愈嚟愈癲，有人向劉Sir爆料，鰂魚涌太古城景天閣高層兩房單位要賣成910萬元，實用呎價1.68萬元。代理又話，大埔太湖花園8座極高層三房單位，近期以538萬元賣出，單位實用呎價破一萬元。
劉Sir