2014-09-03
太陽報
商場物業交投暢旺，繼早前領匯（00823）先後放售多個商場項目後，劉Sir發現市場上有投資者趁商場「有價有市」，亦大手放售手頭商舖物業。新光酒樓集團啱啱搵代理標售黃大仙嘅新光中心同埋葵興嘅新葵興商場部分舖位，連埋上月推出另外兩項舖位，四項物業夾埋意向價共約30.2億元，其中位於黃大仙嘅新光中心意向價約14億元最高。
新光酒樓集團昨委託戴德梁行幫佢哋旗下新光中心地舖入口及1樓至4樓同埋葵興新葵興商場地下、部分2樓及3樓全層進行招標。
該行投資部主管葉健均對劉Sir講，兩個項目建築面積分別約9.5萬方呎及5.5萬方呎，意向價分別約14億元及10億元，本月二十五號截標。
葉氏又話，原來以上兩個商場都係業主喺三十幾年前一手買番嚟。
戴德梁行商業部董事黎英偉話，兩項物業都可以拆售，不過，當然要視乎新買家嘅需要。
黃大仙新光可拆售
該行香港商業及商舖部主管林應威話，依家新光中心基本設施非常完善，而且又可拆售，加上黃大仙區都有好多名勝，可以吸引一定數量嘅旅客。所以該商場有條件做主題商場，目前租值都仲有一定上調空間。
其實早前新光酒樓集團已經透過其他代理標售另外兩項物業，包括葵涌葵星中心地下93至95號連高層地下舖位，同埋荃灣中心地下G3舖，以上兩項物業意向價分別約4.8億元及1.4億元，所以，四項物業加埋就超過30億元。
ONE TERMINAL月中賣
另一方面，市場上又有「劏舖」項目，美聯旺舖董事盧展豪稱，由佳寶集團持有嘅屯門壹號總站ONE TERMINAL，本周五就會公布價單及收票，今個月十六號開賣。
大手買入5伙或以上嘅買家可以優先預購，買家可享兩年5%租金回報，項目會拆售300個舖位，單位建築面積約48至140方呎，入場費約99萬元。
佳寶集團集團總經理馮華高話，今次項目裝修費約5,000萬元，佢又話，依家「好舖難求」，一嚟要睇實集團現金流，二嚟又想買舖，但啲業主都未必肯賣。
劉Sir