2014-09-01
太陽報
香港人口愈嚟愈老化，想晚年生活過得豐盛，最好有錢又有樓揸手，但世事點會咁完美，唔少人供完層樓都已經無錢剩，所以近年有唔少退休有樓階級，會將層樓做逆按揭，每個月可以攞番筆錢。根據按揭證券公司資料，依家安老按揭計劃累計申請宗數有653宗，做按揭嘅單位平均市值約莫470萬元，最多人拎嚟借錢嘅大型屋苑，係港島鰂魚涌太古城同埋荔枝角美孚新邨。
劉Sir睇到按揭證券公司提供嘅數據，今年頭七個月數據，安老按揭計劃收到118宗申請，同舊年差唔多，而已經累積收到嘅安老按揭計劃申請有653宗，單人申請佔66%，雙人就有34%，而做按揭嘅物業，平均市值約莫470萬。
上車盤豪宅均有份
不過，如果細心睇樓價類別，樓價由80萬去到4,500萬元都有，唔少都係大型屋苑，講緊最多係太古城同埋美孚新邨。
另外，做呢類按揭嘅物業亦都有單幢樓同獨立屋，樓齡由一年至五十三年，平均嚟講係三十年樓左右。
美聯物業吳家棟話，太古城係港島老牌藍籌屋苑之一，有業主將單位拎去申請安老按揭計劃都唔出奇；而年頭嗰陣，屋苑都有零星退休公務員買樓個案，但係就唔知佢哋有無順手攞層樓去申請埋安老按揭計劃。
中原地產陳靄華就話，依家美孚新邨嘅業主普遍係約莫四十歲嘅中產，不過，傳統老牌大屋苑，始終長者比例都係多啲；而八月份屋苑就做咗超過20宗買賣成交，兩房單位成交價喺500餘萬至超過600萬元之間，三房就賣緊680萬到750萬元，要視乎個單位嘅位置同景觀。
假設一名六十歲兄長與五十五歲弟弟以價值500萬元的單位一同申請貸款，每月收取年金金額約1.4萬元，若五年後物業升值到700萬元，有需要申請者可重新申請收取年金十年，每月收到的年金會增加到超過1.8萬元。
申請個案年增五成
按揭證券公司仲話，舊年安老按揭新申請個案有接近220宗，按年多咗一半，反映計劃受歡迎，申請人士可以揀分十年、十五年、二十年又或終身去收取每月年金。
劉Sir