2014-01-24
太陽報
政府對物業銷售規管愈來愈嚴謹，代理自然會謹慎啲以免行差踏錯。劉Sir睇番地產代理監管局嘅最新數據，原來舊年當局收到嘅投訴個案，對比前一年減少咗約一成，錄得494宗。不過，地監局就高度關注新盤「水分票」情況，話代理為客戶墊支係違規行為，仲已經立案跟進1宗涉嫌違規個案，最高罰則係罰款30萬元同埋吊銷牌照。
地監局主席陳韻雲同劉Sir講，舊年該局接獲494宗投訴個案，對比二○一二年減少咗約10%。
當中與一手物業有關個案佔44宗，都係涉及未有同客戶訂立或解釋地產代理協議，以及提供咗唔準確或誤導性嘅物業資料等。
立案跟進代客墊支
舊年初開始以實用面積計價，全年發現93宗違規個案。不過陳韻雲話，違規個案大部分喺上半年發生，只有3宗喺下半年錄得，反映代理已即時作出改正，業界大致遵從有關要求。
佢仲話，該局已經增加咗人手同埋加密處理投訴，所以舊年已處理嘅投訴有634宗，按年增加約28%，同時加緊巡查一手新盤，全年巡查咗1,475次，較對上一年勁增約45%，巡查次數係近幾年最多。
至於地監局舊年就向577名持牌人或前持牌人採取行動，數字按年增大約25%，當中有12人撤銷牌照，個別就同執業操守有關。
劉Sir都留意到最近有代理銷售新盤時代客墊支，陳韻雲重申此舉係違規行為，最近「放蛇」行動發現1宗涉嫌違規個案，已經立案跟進。
市況冷清 考牌大減
由於舊年樓市淡靜，所以，營業員以及地產代理資格考試人數，按年減少36%及21%，至5,494及5,102人。另外持牌代理人數截至去年底錄35,966人，亦按年跌咗1%。
執業新指引望首季推
展望今年工作，佢話地監局推出嘅「紀律處分新計劃」已經喺年頭生效，承認有違規嘅代理未必遭受處分，但兩年內再犯就會有更嚴厲嘅紀律處分。
由於近年咩都講求數碼化，所以今年會發出相關執業指引同制訂電子嘅代理協議，希望可以喺第一季推行。
劉Sir