2021-05-14
明報
【明報專訊】自從日本大股東入主、譚仔同譚仔三哥兩大本地米線品牌合併後，可以話氣勢如虹，繼譚仔舊年底殺入中環呢個核心金融區後，另一品牌三哥近日仲頂埋翠華（1314）喺中環威靈頓街?4000呎巨舖。對唔少蒲友而言，呢間翠華可以話係佢哋喺蘭桂坊的集體回憶，唔知日後疫情完結，呢間三哥會否考慮效法昔日翠華咁24小時營業呢？
譚仔國際宣布，承租中環威靈頓街昔日翠華分店舖位，地庫連地面兩層面積約4000呎，開設中環區第一間譚仔三哥米線，新舖預計第二季開張。呢個舖位昔日由翠華租用22年，佢最出名係因為24小時營業，蘭桂坊一眾蒲友過往喺黑麻麻?酒吧交朋結友後，都會嚟到呢間翠華喺正常燈光下見面。𠵱家又限聚令，晚市又多限制當然無計，但日後疫情完結，唔知三哥會唔會保留番呢個優良傳統呢？
email:piano@mingpao.com
[小琴密語]