老牌公司千五萬買凱旋門投資 單位唔夠400呎

【明報專訊】本地樓市疫情下仍活躍，不少富豪都買埋一份，曾任三屆全國政協林光如旗下星光集團(0403)前日出公告，指公司斥1570萬元買入一個九龍站上蓋凱旋門單位，單位原來400方呎都唔夠，睇怕都唔夠自住，星光就話買嚟中長線投資，咁唔知係咪會放租呢？ 用作中長線投資 小琴翻查返近期凱旋門成交，發現上個月同座同方向都有兩個單位成交，兩個單位實呎都係接近400方呎，成交價分別係1450萬同1465萬元，事隔一個月星光出手已經貴咗7.1%，大嗱嗱成百萬㗎，不過最緊要長遠有得升值就得啦。星光集團都算係老牌公司，1993年上市，主要從事印刷及製造包裝材料、標籤及紙類製品，包括環保紙類產品生意，今次無端端走去買樓，公司就解釋話係地段高貴難得，買嚟中長線投資咁話喎。