2014-08-26
太陽報
近年華懋集團積極在港買地及重建物業，尋日該集團嘅執行董事兼行政總裁楊光透露，佢哋旗下3幢加入綠色建築元素嘅核心區商廈，將會喺未來兩至三年陸續落成。包括喺灣仔軒尼詩道嘅熙信大廈，仲有中環德輔道中嘅華懋中心I期及II期，3幢商廈加埋嘅總投資額超過28億元。其中熙信大廈有銀行洽租全幢，中環嗰幢II期嘅基座4層，亦有銀行話想租嚟開分行。
楊光仲同劉Sir講，熙信大廈商廈重建依家就已經拆緊樓，今年底就會拆完，預計大廈會喺二○一七年底落成。大廈樓高31層，每層樓面面積約12,422方呎，全幢大廈可供出租嘅建築樓面面積約31.4萬方呎。
中環供應少 前景睇好
上述項目嘅投資額約19億元，聽佢講，依家已經有銀行洽租全幢，但就唔講得具體內容。
楊光又話，華懋中心I期及II期，預計今年內完成地基工程，兩年內兩幢大廈就會落成，大廈分別樓高26及28層，每層樓面面積分別約3,179及3,544方呎，可供出租嘅建築樓面面積分別約8.2萬及9萬方呎。兩項目投資額分別約4億元及逾5億元，其中II期基座4層有銀行洽租，話想租嚟開分行。
楊光又話，依家中環地盤唔多，商廈供應唔多，市場需求大，佢又話自己對本港商廈市場就好有信心，集團過千億資產，九成都喺香港區。
旗下項目注綠色元素
另外，佢話集團旗下未來大部分商廈同住宅項目都會加入綠色建築元素，而集團主辦嘅第三屆可持續發展雙年研討會將會喺十月十日舉行。
對於今日同周五截標嘅觀塘市中心住宅項目及尖沙咀中間道商業項目，佢話集團已經研究緊、計緊數，又話集團投地會非常謹慎，只會揀優質地皮。
中原麥偉嫦話，上環商廈惠南大廈，以約5.5億元售出，新買家係羅氏集團。第一太平戴維斯蕭兆新話，代理放售葵涌聯發工業（第二）大廈，意向價2.5億元。
美聯工商舖（00459）啱啱公布中期業績，收益約2.45億元，按年跌36%；期內純利只約1,152萬元，跌57%。
劉Sir