2014-08-25
太陽報
今個星期會有兩個有番咁上下規模嘅項目截標，第二次推出嘅市區重建局觀塘市中心重建計劃第二及三發展區，就會先喺聽日再次截標，今次市建局就招標條款作出讓步，好似取消80億元入場費等，唔少測量師老友都覺得修訂條款後，反應會好過第一次，睇怕唔會再流標；而緊接喺星期五就輪到尖沙咀中間道停車場商業項目截標，呢幅係區內絕無僅有嘅商業供應，市場估值最高超過37億元。
上述觀塘重建項目早排首次招標時收4份標書，最後唔符合要求流標收場。
市建局即時修訂招標條款重推項目，除咗取消項目原定80億元嘅入場費，延長項目平台嘅完工日期去到七十二個月，仲破例容許獲邀發展商以外嘅財團，加入10家獲邀發展商組成嘅財團入面等。
今次嘅修訂，劉Sir班測量師老友都覺得幾合理，估計幾有機會順利批出。好似高緯環球張翹楚就話，呢個觀塘重建項目首次招標雖然唔成功，但已經有試水溫嘅效果。
新地長實擬投觀塘
再加上市建局修訂有關招標細節後，重新開放市場畀其他財團參與，但唯一考慮係佢哋喺時間上足唔足夠尋找合作夥伴。但無論如何，相信競投反應都會好過第一次。
理想城市張聖典都認同，今次放寬財團組合同埋取消入場費做法合適，可以成功批出機會都幾高。其實劉Sir知道部分大型發展商都好可能入標，好似新地（00016）同埋長實（00001），重新招標後都先後講過有意入標。
中間道地供應罕有
至於星期五截標嘅尖沙咀中間道商業項目，總樓面大約33.97萬方呎，發展商要負責重置停車場，而面積會計入項目嘅總樓面入面，不過，市場就覺得唔會點影響發展商入標意欲。
高緯環球張翹楚話，尖沙咀同類商業新項目可以話零供應，呢幅中間道商業地，唔起寫字樓都可以發展酒店，預期上述項目投標反應會唔錯。
佢估計每方呎樓面地價約1.1萬元。折合估值37.37億元，係市場嘅上限價。
劉Sir