2014-08-22
太陽報
近期全城搶入市，搞到樓價癲升，不過商品大王羅傑斯早前就明言，依家本港樓市已經存在泡沫，唔少「聰明人」反而趁機沽貨。劉Sir留意到前行政會議成員林奮強或有關人士，最近就以2,328萬元賣咗九龍站擎天半島1座高層單位，件貨揸咗十年，依家賣出帳面賺1,490萬元，計埋今年初賣出嘅西半山單位，合共套現約3,688萬元。
上述賣出嘅擎天半島1座中高層F室，建築/實用面積約1,440/1,087方呎，建築/實用呎價約16,167/21,417元。
上述擎天半島高層單位由一間公司喺二○○四年以838萬元購入，林奮強係公司董事之一，依家賣出升值近1.78倍。
林奮強一向有投資住宅物業，今年初曾經以1,360萬元賣出西半山寶華軒一個低層A室，個單位揸咗十二年，帳面賺超過780萬元。
嘉亨灣連約賣1133萬
樓價升到咁高，部分業主其實對後市有啲保留，所以即使冇咩錢賺都趁早出貨。中原陳凱超話，西灣河嘉亨灣5座中層D室，實用面積675方呎，業主原本用嚟收租，最近決定以1,133萬元連租約賣出，實用呎價約1.68萬元，單位揸咗兩年，只係升值約53萬元或5%。單位原業主係內地人，喺度揸咗唔少單位，今年初就曾經賣出一個同屋苑單位。
該行林少禮話，鴨脷洲南灣都有業主冇咩錢賺離場，好似市場近期錄到嘅3座中層C室，實用面積763方呎，以1,340萬元賣出，實用呎價約1.76萬元，個單位一一年到依家升值咗59萬元或4.6%。
遠店家族增購東堤小築
近期樓價狂升，「燒炭勝地」長洲東堤小築都大翻身，遠東酒店邱德根家族成員或有關人士近期再以高達250萬元增購咗屋苑3座一個A室，計埋今個，該家族先後買入咗5個東堤小築單位，其餘4個全部係地下單位，每個購入價介乎138至160萬元，合共涉約841萬元。
劉Sir