2014-08-21
太陽報
近幾個月本港甲級商廈市場旺番唔少，做價亦唔錯，其中港島嘅上環信德中心西翼自五月起已經錄到至少5宗成交，涉及金額共約2.45億元，個別成交呎價最高有成2.48萬元。至於九龍尖沙咀嘅康宏廣場亦罕有咁錄到至少3宗成交，呎價去到1.41萬元。投資者廖偉麟同黎永滔都睇好未來甲級商廈買賣市場前景，預計下半年整體甲廈呎價可上升約10%或以上。
劉Sir睇到市場資料，五月至今信德中心西翼呎價及成交量持續向上，由五月及六月各錄得1宗成交，上升到七月有3宗成交。
會展廣場呎價逼三萬
其中七月該廈高層06B至07室以8,935萬元賣出，呎價高見2.48萬元。該商廈期間成交樓面共約1.1萬方呎，總成交價約2.45億元。
另外，灣仔指標商廈會展廣場辦公大樓，喺五月起到依家亦錄到兩宗成交，涉及金額共1.69億元，其中高層01至02A室，面積約3,468方呎，以1億元賣咗，呎價高達2.89萬元，直逼高位。
中原黃瑋琮話，個市咁旺，會展廣場辦公大樓海景單位，呎價絕對有機會挑戰30,000元。至於近年成交疏落嘅康宏廣場，過去三個月該廈亦錄得3宗成交，涉及金額共約1.15億元，成交單位面積由約2,185至3,908方呎，平均呎價約1.32萬至1.41萬元。
資金充裕 炒家撲入
紀惠集團副主席廖偉麟同劉Sir講，股票市場興旺，甲級寫字樓市場同樣有支持，帶動近月成交回升，加上依家甲廈呎價較兩年前低水達10%，相信下半年整體甲廈呎價可上升10至15%，呎租則上升5至10%。佢又話，近月市場吉舖多，依家只係靠拆舖支撐大市，部分投資者有機會轉投商廈市場。
資深投資者黎永滔都話，依家經濟環境不俗，市場資金充裕，同時預期短期內息口不會上升，刺激成交上升。佢預計下半年甲級商廈呎價及呎租可同樣上升5至10%。
劉Sir