2014-12-23
太陽報
兩個禮拜前截標嘅市建局兩個深水埗重建項目，終於喺昨日揭盅。其中規模較細嘅海壇街需求主導項目，由中小型發展商遠展（00035）撼贏唯一競爭對手信置（00083）投得，成為集團首個市建局項目，預計總投資額約莫2億元。至於海壇街及桂林街大型重建項目，就由長實（00001）中標，佢哋事隔超過兩年再次投得市建局項目。
市區重建局昨日宣布，經過招標競投後，該局決定與遠展合作發展深水埗海壇街229A至G號需求主導項目，至於同區海壇街、桂林街及北河街重建項目，就會同長實合作。
主攻細戶 投資兩億
劉Sir知道，今次批出嘅海壇街需求主導項目，雖然市建局邀請咗25家財團入標，但最後只收到2份標書，由遠展同信置「單挑」，最後由遠展中標，集團高級營業及市務總監方俊同劉Sir講，呢次係遠展首個投得嘅市建局項目，佢話集團喺區內有發展心得，計劃提供開放式同埋一房細單位，預計總投資額約莫2億元。
至於超過兩年未有投得任何發展項目嘅長實亦終於發市，擊敗新地（00016）及恒地（00012）等8個對手，奪得海壇街及桂林街大型重建項目。原來長實對上一次投到地皮已經要追溯到二○一二年十一月，當時以逾29億元投得馬鞍山落禾沙彩沙街住宅地；至於對上投得嘅市建局項目就係中環卑利街重建項目，喺一二年四月底奪得。
兩幅地價傳低預期
海壇街需求主導同埋海壇街及桂林街兩個重建項目，市場估值約莫1.45億以及22.86億元起步，市傳今次兩幅地嘅地價都低過預期。
老友高緯環球張翹楚就咁睇，佢話最近長沙灣一帶新盤都賣得唔錯，佢覺得今次由長實出擊投到大型重建項目都有一定指標性，證明最近中小型財團頻頻投得地皮情況並非一面倒，亦反映大型發展商對後市都抱樂觀取態。
睇返資料，上述海壇街項目提供約69伙，但市建局會保留約5層樓面做換樓用途，將來發展商賣樓收益達3.5億元以上，要向市建局按比例分紅。而提供845伙嘅海壇街及桂林街項目，市建局保留27伙，將來發展商賣樓收益達78億元以上要分紅。
深水埗海壇街229A至G號
住宅樓面：約34,876方呎
商業樓面：約4,306方呎
提供單位：約69伙
市建局保留作換樓單位：5層樓面
中標財團：遠展
預計投資額：約2億元