2014-08-20
太陽報
新盤供應愈推愈有，堅持月月有樓賣嘅新地（00016），好快又有大盤登場。今次係位於供應重鎮嘅將軍澳天晉IIIA，尋日啱啱攞到預售樓花同意書。數吓手指，呢個盤樓花期長逾二十八個月，係政府放寬預售樓花期去到三十個月之後，獲批賣樓紙嘅最長樓花期新盤。呢個盤最特別係提供區內暫時未有嘅獨立屋，最快今個禮拜開放示範單位同下星期極速開售。
新地副董事總經理雷霆尋日同劉Sir講，天晉IIIA嘅預售樓花同意書尋日啱啱到手，幾日內會派發樓書同開放示範單位，月底前就會賣。
佢重申，個盤間隔多元化，相信可以吸納唔同類型用家。睇返地政總署資料，天晉IIIA預計二○一六年十二月底先落成，樓花期長逾二十八個月。
周內或開示範單位
新地代理助理總經理陳漢麟又話，天晉IIIA設有四款戶型示範單位，今個星期有機會開放，最快下周開售。
項目4座高層物業嘅分層戶，面積由334至1,278方呎，當中包括部分特色戶，最特別係另外有5座獨立屋，每座面積1,594至1,603方呎，部分三房單位會用開放式廚房設計。
同時，其他發展商都唔執輸繼續加推搶客。好似長實（00001）嘅荃灣環宇海灣，四房單位續受追捧，單是上周速售15伙，累售單位增至1,621伙，套現逾112億元。
環宇擬添優惠吸客
環宇海灣今個星期六會再推出20伙優惠名額，買家享高達售價12.5%折扣及總值29.8萬元優惠。同系大埔嵐山第I期昨亦發出新銷售安排，今個星期六發售1個地下花園戶及7個連天台戶。
信置（00083）大埔逸瓏灣I今開售新一批56伙，價單售價887.6萬至6,804.2萬元，扣除19.25%最高折扣優惠後，折實售價716.73萬至5,494.39萬元。
劉Sir