2014-08-19
太陽報
過去十年，本港受惠內地個人遊政策，零售業急速增長，生意額亦大幅上升咗186%，對倉庫需求非常之大，但係同期全港倉庫供應好似冇咩增長，升幅只係得5%咁少，提供約3,830萬方呎，空置率已經創下歷史新低，截至今年六月只係得0.4%。世邦魏理仕同劉Sir講，如果本港倉庫空間持續唔夠，相信本港零售商同物流商就會搬去其他地區。
該公司最新研究報告指出，過去十年本港零售業顯著增長，旅客數目不斷增加，生意額上升左186%，單單今年到依家，就多咗43個新品牌進駐本港零售市場。喺舊年，零售市場租戶就佔用咗本港倉庫空間差唔多50%。
過去十年，全港倉庫供應好似冇咩增長，由○四年嘅3,650萬方呎上升至一三年底嘅3,830萬方呎，升幅僅約5%。
難滿足零售業需求
另外喺十年內，由政府拍賣嘅工業地皮竟然只係得4幅，同時集中喺青衣及葵涌區，合共提供約370萬方呎新供應，佔政府同期拍賣同埋招標嘅土地僅僅6.2%，喺缺乏供應同埋零售業強勁增長嘅情況下，倉庫市場空置率更創下歷史新低，只有約0.4%。
該公司執行董事戴文預計，未來五年本港嘅零售佔用空間與倉庫供應將會持續失衡，零售業未來更加需要存倉及擴充物流設備以配合需求。而研究部主管陳錦平就話，雖然而家深圳倉庫質素唔錯，租金水平亦都係本港嘅三分之一，但並不足以令租戶選擇以深圳作為據點。
中環地舖億二標售
另外，新地（00016）同市區重建局嘅大角咀形品．星寓地下1及2舖及外牆廣告A及C以招標形式出售，負責招標係第一太平戴維斯，十月六日截標。
另韋堅信測量師行許偉國話，代理標售中環德輔道中167號香港貿易中心地舖，意向價約1.2億元。投資者蔡志忠同劉Sir講，北角英皇大道廣場兩個1樓舖位獲另一投資者羅珠雄預留。
劉Sir