【明報專訊】房協喺今年1月宣布推出「富戶政策」新安排，街工立法會議員梁耀忠噚日喺立法會，向運輸及房屋局長陳帆提出書面質詢，入面提到自己曾經就呢項政策，搵房協高層見面但被拒。Emily搵梁耀忠了解件事，佢話覺得「好㷫」，因為自己只係想問清楚「富戶政策」，同埋反映居民意見，點知房協成個獨立王國咁，官僚到一個程度係可以完全唔聽議員意見。
梁耀忠又話，自己打過電話畀房協高層好幾次，但對方態度好差，淨係話唔會見面。佢仲話自己唔係唯一受害者，連邵家臻及一啲當區區議員都同樣唔見。梁耀忠亦提到，房協以往加租都會同議員見吓面，但𠵱家只肯派屋邨經理同居民見面，佢認為做法有問題，但就未諗下一步行動。