2014-08-12
經濟日報
欄名:網上智慧
近日熱錢持續流入，股市繼續拾級而上，港股雖然前幾個交易日回吐少少，但整體向上的姿態明顯，升浪似乎未見頂，有傳因為內地股民憧憬滬港通會激活股市。
樓市方面，7月成交量是兩年新高，價格方面再不停破頂，有個別屋苑更加連環破頂，股樓大旺的勢似是愈演愈烈。
一講到股樓關係，其實幾微妙，有說話股市走在樓市之前，亦有人話股市跌樓市就未必一定跌，但股市升，樓市就一定有份升，這個說法似是勉強，但又好似係事實，所以我就用中原城市領先指數（Centa-City Leading Index，簡稱CCL）的數據同恒指比較。
由有數據開始計，可以發現其實恒指同CCL都有一定程度相似，我做一個調整，將CCL的數據調整去兩星期前的恒指，因為CCL的數字滯後。
不難發現恒指同CCL有一定的關係，不過恒指波幅明顯大點，像2007年時炒上30000點時，再2008年金融海嘯回落6成，但CCL就只跌25%左右，這可以說是由於恒指的流動性大好多。
其實我只想帶出一點，就是似乎股樓兩個市場有着正關係，而這個立論並不難理解，因為我當你在股市賺大錢，最好的禮物又好像是買層樓，所以股市旺帶旺樓市亦係一個合理的立論。
恒指升穿07年高位不是夢
而如果你認同這個立論的話，下一個問題就係今次這個浪會升幾多了。今日的恒指以PE計是12倍左右，加上資金不停流入，恒指個市底應該幾強。陰謀論地看，如果你係外資，明知仲有兩三個月滬港通的錢就會湧入香港買貨，有一條大水喉射入來的情況下，炒高派貨比內地資金似乎又是一個贏硬的地步。
那炒到幾多才叫高呢？看看道指2007年高位老早就破了頂再「升突」一成幾，對比港股2007年高位的32000幾點，連2007年都未破到。以咁低PE的港股，加上如此多資金流入，個人認為要炒過2007年的高位應該不是夢。
如果恒指升到36000，即係要升多4成先夠，你估細價樓又會因為這個滬港通而升多少呢？愈睇愈似一個大牛市來臨，有樓等明年小陽春才賣，可能明年不單只是一個小陽春。