2014-08-11
太陽報
今年政府推出好幾幅屯門地，今個星期五就有兩幅小型地皮截標。雖然呢區地皮近排成交嘅地價唔係咁理想，不過，劉Sir同測量方面嘅老友傾開，又覺得今次地價未必會好差，事關即將截標嘅兩幅地皮質素比較好。尤其係樂翠街住宅地，由於可興建洋房，所以市場依家最高估值去到約1.1億元，每方呎樓面地價約8,000元，隨時創區內呎價新指標。如果連埋仁政街限量地，最多有機會為庫房帶來約3.1億元收益。
屯門係未來住宅供應嘅重災區，搞到啲發展商喺呢區吸地，出價都唔敢太勇，令區內地價有下滑趨勢。好似五月份批出嘅井財街地皮，更出現約1,530元區內樓面呎價低位，之但係市場對即將截標嘅樂翠街住宅地及仁政街限量地，都仍抱持樂觀取態。
樂翠街每呎睇八千
其中樂翠街低密度臨海地，分分鐘有機會創全區呎價新高。理想城市企業估值部主管張聖典同劉Sir講，樂翠街住宅地發展密度較低，地積比率只約1.2倍，總樓面約1.35萬方呎。
由於地皮附近以洋房項目為主，雖然中標財團要自行興建接駁道路，但始終臨海洋房地有價，可以高價批出都唔出奇，地皮估值約1.1億元。折合每方呎樓面地價約8,000元，有機會創區內新指標。
仁政街限量建125伙
至於仁政街限量地最高可提供約67,842方呎樓面，規定提供不可以少過125個住宅單位，雖然有限量條款，但係地皮位置唔錯，屬市中心地段，鄰近西鐵屯門站同大型購物廣場，所以有一定吸引力。
張聖典估計，呢幅地每方呎樓面地價約3,000元。折合估值約兩億元水平，為市場上限價。
睇番今年政府已經批出嘅3幅屯門地，全部都係住宅限量地，包括屯門良德街、震寰路與良德街交界，以及井財街地皮，成交每方呎樓面地價，介乎約1,530至2,517元。
劉Sir知道，雖然今年批出嘅屯門地皮地價唔係幾好，不過，可以發展洋房嘅土地就唔同講法。好似舊年年底批出嘅屯門小欖冠峰街低密度地皮，每方呎成交樓面地價有成7,119元咁多，所以市場睇好今次樂翠街地皮地價都不無道理。
劉Sir