2014-12-10
太陽報
香港的樓價一向高企，劉Sir睇到世邦魏理仕最新嘅《全球居住調查報告：國際城市比較》，以全球主要城市嘅住宅市場做比較，截至今年十月，香港主要新建住宅平均每方呎售價約25,662元，係全球第二最貴嘅住宅市場，而第一位係倫敦，平均呎價約26,364元。
份報告話，第一、二位一直係香港同倫敦之爭，而香港由於徵收印花稅，所以令到主要新建住宅物業價格今年跌約5至10%。而香港主要新建住宅截到今年十月，平均每方呎售價約25,662元，僅次於倫敦嘅26,364元，至於第三、四位就係紐約同悉尼，分別約23,712元與15,834元。
住宅供應仍未達標
而今年，香港私人住宅市場供應預料按年會增加約17%，莫約多咗2,270伙，令到全年整體住宅市場供應會有約15,820伙，不過，仍然低過政府每年2萬伙新供應嘅目標。
雖然呢批新供應唔會對整體住宅樓價帶嚟太大影響，但由於新供應集中喺某啲區域，尤其係元朗、荃灣及沙田呢三區，已佔新供應約40%，所以呢類區域樓價將出現輕微變動。
世邦魏理仕估計，香港房地產唔同市場嘅分歧將繼續擴大，豪宅市場因為未來供應有限，所以相對比較沉寂，但一般住宅因為供應量增加同發展商願意推出優惠促銷，所以交投將會增加。
另外，份報告又睇到，香港喺全球優質零售物業市場同優質寫字樓市場嘅租金排名同係首位，每方呎租金分別約2,818元與144元。
明年豪宅或跌價5%
至於本地市場，仲量聯行香港董事總經理兼香港資本市場部主管曾煥平話，展望明年，將會有更多新盤推出，相信開價會具競爭力。而由於利率可能會上升，加上調控政策嘅風險增加，所以明年樓價將會有下行風險。
曾氏估計今年豪宅同中小型住宅樓價分別升約2.3%同5.7%，而明年呢兩類市場可能個別發展，豪宅有機會跌5%以內，中小型住宅就升5%以內；豪宅租金今年跌約4.1%，明年相信有機會升番5%以內。
劉Sir