2014-01-21
太陽報
私人住宅落成量唔理想，近年政府已密密手增供應補救，並預期會大豐收。有代理指出，舊年全年私宅落成只得8,251伙，係有紀錄以來次低。不過，有部分新盤落成期延到今年，加上好似長實（00001）將軍澳嘅緻藍天同新地（00016）嘅屯門瓏門二期呢啲大盤，都會相繼今年落成，估計全年落成量可大幅推高到1.8萬伙，比舊年升1.18倍，勢創○四年後新高。
呢幾年私宅落成量的確偏低，但中原黃良昇對今年情況就幾有信心，佢同劉Sir講，舊年私宅落成唔能夠達標，係因為部分新盤落成期押後到今年，再者今年都不乏逾千伙嘅大型住宅項目落成。
長實兩項目涉逾2700伙
好似上述長實緻藍天預計今年十二月落成，提供約1,648伙，而同系預計三月落成嘅大埔嵐山一期，提供約1,071個單位。兩項目共提供約2,719個單位。
新地嘅屯門瓏門二期提供約911伙。黃氏斷言，今年落成量會大幅增長，估計全年約1.8萬伙，屆時將會比舊年全年數字大幅飆升約1.18倍，仲會創○四年後高位。
事實上，舊年落成數字確實差強人意，全年落成項目有33個，除咗元朗尚悅同將軍澳峻瀅落成單位有2,580同1,777伙較有睇頭外，其他都只係規模較細嘅項目，以致全年落成只係得約8,251伙，為有紀錄次低，相比一二年都大幅減少咗1,898伙或約19%。而過去五年平均每年落成量亦不足萬伙，平均約9,682伙。
鯉魚門徑改住宅遇阻
另一方面，政府亦透過改劃土地用途增加供應。劉Sir知道，城規會近排就修訂咗茶果嶺大綱圖，諮詢期收到嘅611份申述將會喺今個星期五審議，其中改劃住宅地並納入賣地表嘅鯉魚門徑地皮，同埋計劃發展公營房屋嘅高超道用地，反對意見就分別佔344同埋241份。
為確保未來有足夠住屋供應，規劃署並唔支持反對意見，料城規會維持有關修訂建議，用作私人住宅及公營房屋用途。
劉Sir