2014-12-04
太陽報
新一期居屋就快推出，加上要入市嘅白居二買家都入得七七八八，令最近二手居屋交投慢番啲。地產代理嘅數據睇到，上個月二手居屋買賣登記只得438宗，比十月份跌咗超過一成四，仲創咗九個月新低。但做價依然硬淨，旺角富榮花園同深水埗怡靖苑，有成交單位做價打入歷年十一大排名嘅第三同第四位。劉Sir聽中原黃良昇講，十一月份二手居屋買賣登記有438宗，總值14.94億元，比起十月嘅511宗同17.4億元，分別跌咗14.3%及14.1%。
錄得嘅宗數仲係九個月新低，而金額亦係八個月新低。估計係因為受佔中影響，市民觀望，同時今個月又會有全新居屋推出，明年就推第一輪白居二計劃，所以影響咗二手居屋交投。
不過，市靜就唔等於價跌，依家業主仍然係唔好價唔賣，所以上個月有兩宗個案成功打入十一大位置，其中富榮花園18座中層G室以690萬元賣出，創歷年第三高，而怡靖苑寧靜閣中層3室就賣咗689.96萬元，排名第四位。
富健綠表實呎破五千
至於首十一個月二手居屋買賣登記累積有5,725宗，總值181.53億元，比舊年全年高出14.6%及22.1%，金額創下四年新高。
市場近日有班白居二買家趕喺限期前入市。祥益地產黃慶德表示，屯門居屋富健花園7座高層E室，實用面積431方呎，由一名次批白居二買家以220萬元買入，實用呎價約5,104元屬市價。
富誠地產陳錫金話，慈雲山慈愛苑錄到一宗綠表價成交個案，個單位係A座中層6室，實用面積554方呎，成交價338萬元，實用呎價6,101元，單位十七年升值1.5倍。
內地客高8%買天愛苑
天水圍居屋天愛苑都錄到一宗高價成交，中原馬斯力話，啱啱賣出嘅B座中層16室，建築/實用面積741/541方呎，由內地買家以338萬元買入，實用呎價6,248元，較市價高出約8%，創同類單位新高價。據悉，新買家要畀買家印花稅同雙倍印花稅，稅款加埋超過65萬元。
劉Sir