2014-12-03
太陽報
唔少車主都話喺香港養車難，除咗油價貴之外，車位更加要爭崩頭，近呢幾年嚟車位升值潛力都好理想。最近跑馬地禮頓山有車位以400萬元賣出，撇除發展商因為收購項目而購買嘅車位，今次做價係全港第二高，做價可以買到天水圍嘉湖山莊或沙田第一城嘅兩房細單位，而相比個車位○八年購入價升咗三倍。
劉Sir睇到土地註冊處資料，禮頓山1樓一個單號車位最近以400萬元賣出，今次透過公司名義購入，而原業主就喺○八年以100萬元購入個車位，即六年間升咗三倍。據聞，買家或有關人士近期亦都以2,600萬元向相關業主買入咗同屋苑一個6座單位。而屋苑對上嘅新高紀錄喺去年錄得，當時車位最貴做到380萬元。
車位做價一直都有升無跌，劉Sir數數手指，全港先後曾經出現過3宗做價達400萬元或以上車位成交，其中私募基金豐泰地產喺二○一二年為咗免除強拍，不惜以「重金」以428萬元買入西半山適雅大廈一個車位，成功統一項目業權。
陽明做價急升13%
不過，若果撇除因為收購所買入嘅車位，現時全港最貴車位，應該係今年中恒地（00012）以424萬元賣出嘅西半山天匯5樓一個單號車位。
近幾個月市場有多個屋苑錄到車位創新高成交，好似大潭陽明山莊有個L3層雙號車位，就以238萬元創新高賣出，比起本年九月期間所錄得嘅210萬元舊紀錄，再高出約13%。
寶翠摸貨嗌高放
而西區寶翠園發展商最近拆售車位，部分車位售價高達350萬元，由於供不應求，所以隨即有業主將車位以叫價370萬至380萬元放摸售，搞到屋苑車位租金都癲升，最近成交月租去到8,000元，市傳個別月租叫價約1萬元。
另外，土地註冊處資料，禮頓山第7座高層B室以5,400萬元售出，買家為曾維才（TSANG WAI CHOI）。據了解，該單位建築/實用面積約1,911/1,461方呎，建築/實用呎價約2.83萬/3.7萬元。
劉Sir